Situata e zjarreve në Frakull mbetet shqetësuese, pasi një vatër tjetër po avancon në terren dhe kërkon reagim urgjent për të penguar përhapjen e flakëve.
Përmes një postimi në rrjetet sociale, deputeti i PD-së, Luan Baçi, ngriti alarmin për rrezikun dhe u bëri thirrje institucioneve që të ndërhyjnë pa humbur kohë.
Të lidhura
None found
Ai kritikoi mënyrën se si po menaxhohet situata, ndërsa ironizoi edhe daljet e zyrtarëve në terren pasi dëmet janë shkaktuar. Sipas Baçit, autoritetet nuk duhet të presin që flakët të ngrihen në qiell dhe gjithçka të digjet, përpara se të shfaqen në media si reporterë nga vendngjarja.
Deputeti theksoi se përparësi duhet të ketë ndërhyrja në kohë, parandalimi i rrezikut dhe vënia nën kontroll e situatës, përpara se zjarri të sjellë pasoja më të rënda.
Në reagimin e tij të plotë, Baçi deklaroi se rreziku nga përhapja e flakëve në Frakull vazhdon dhe se vatra e re kërkon ndërhyrje të menjëhershme. Ai kërkoi që të mos pritet derisa çdo gjë të digjet dhe më pas të njoftohet në media se situata është stabilizuar, zjarri është shuar dhe “prania besnike” ndodhet pranë qytetarëve.
