Chandika Shrestha, 64 vjeçe, u nxor e gjallë pas 11 ditësh nga rrënojat e shkaktuara nga përmbytjet e fuqishme në rajonin e lumit Bhotekoshi, në Nepal.
Gruaja u zbulua në katin e katërt të një ndërtese katërkatëshe në Betravati, në distriktin Nuwakot. Banesa ishte mbuluar thuajse plotësisht nga balta, gurët dhe mbeturinat e transportuara nga ujërat.
Të lidhura
None found
Gjatë operacionit të kërkim-shpëtimit, ekipet dëgjuan britma të dobëta që vinin nga brenda ndërtesës së dëmtuar. Për të shmangur rrezikun e shembjes dhe për të mos e lënduar, ata ndaluan makineritë e rënda dhe vazhduan punën me kujdes, duke hequr materialet derisa çanë një pjesë të murit.
Ujërat e kishin përfshirë banesën e Shresthës, e cila më pas u mbulua nga një shtresë e madhe balte. Ndërsa katet e tjera u shkatërruan, 64-vjeçarja mbeti e bllokuar në pjesën e sipërme të godinës.
Menjëherë pas nxjerrjes, asaj iu dha ujë dhe iu ofrua ndihma e parë. Më vonë, gruaja u dërgua me helikopter në një spital të Katmandusë, ku po merr kujdesin mjekësor të nevojshëm.
Rasti i saj është cilësuar si një mrekulli, pasi ajo arriti të mbijetojë për gati dy javë e izoluar në një nga fatkeqësitë natyrore më të rënda që ka përjetuar Nepali vitet e fundit.
Reshjet e dendura dhe prurjet e vrullshme të lumenjve Bhotekoshi dhe Trishuli kanë shkaktuar përmbytje dhe rrëshqitje dheu, duke lënë pas qindra të vdekur dhe mijëra persona të zhdukur.
Shpëtimi i Chandika Shresthës ka rikthyer shpresën në mes të kësaj tragjedie, ndërsa ekipet vijojnë kërkimet për njerëzit e tjerë që ende nuk janë gjetur.
