Elon Musk, i njohur për SpaceX, makinat elektrike dhe sipërmarrjet teknologjike, ka ndarë së fundmi një këshillë të pazakontë lidhur me problemet e tretjes.
Të lidhura
None found
Në një postim në X, drejtuesi i SpaceX tha se vendos një grumbull librash poshtë pjesës së kokës së shtratit, me synimin për të lehtësuar refluksin e acidit gjatë natës.
Sipas sugjerimit të tij, personat që vuajnë nga refluksi duhet të ngrenë pjesën e shtratit ku mbështetet koka, në mënyrë që i gjithë shtrati të krijojë një pjerrësi të lehtë në drejtim të këmbëve.
Por a ka kjo praktikë mbështetje shkencore?
Ekspertët thonë se parimi mbi të cilin bazohet këshilla mund të jetë i vlefshëm, ndonëse përdorimi i librave nuk është domosdoshmërisht mënyra më e përshtatshme.
Kjo nuk është hera e parë që Musk flet publikisht për refluksin e acidit. Në një rast të mëparshëm, ai kishte këshilluar ngritjen e kokës së shtratit me rreth pesë centimetra dhe shmangien e ushqimit gjatë tri orëve para gjumit.
Ai i kishte thënë gjithashtu YouTuber-it MrBeast se mund të vuante nga refluksi i lehtë gjatë natës pa e kuptuar, duke ndikuar kështu në cilësinë e gjumit.
Refluksi gastroezofageal, i njohur edhe si GERD ose urthi, shfaqet kur acidi i stomakut ngjitet në ezofag dhe shkakton ndjesi djegieje në kraharor.
Normalisht, kthimin e përmbajtjes së stomakut e pengon sfinkteri i poshtëm ezofageal, një muskul i vogël që ndihmon në mbajtjen e acidit brenda stomakut.
Te shumë të rritur, ky muskul mund të mos funksionojë siç duhet ose të jetë më i dobët, duke lejuar ngjitjen e acidit drejt ezofagut.
Simptomat priren të bëhen më të këqija gjatë natës, pasi pozicioni horizontal e lehtëson lëvizjen e acidit drejt ezofagut dhe fytit. Edhe konsumimi i ushqimit pak para gjumit mund ta rëndojë gjendjen, sepse stomaku prodhon më shumë acid gjatë tretjes.
Për këtë arsye, mjekët shpesh këshillojnë shmangien e vakteve të vona dhe ngritjen e pjesës së sipërme të shtratit.
Dr Loai Albarqouni, profesor i asociuar i mjekësisë së bazuar në prova në Bond University, shpjegoi se vendosja e kokës mbi nivelin e stomakut aktivizon efektin e gravitetit dhe ndihmon në parandalimin e kthimit të përmbajtjes së stomakut në ezofag gjatë gjumit.
Ai shtoi se studimet kanë evidentuar edhe një ulje të ekspozimit të ezofagut ndaj acidit gjatë natës.
Një studim i vitit 2012 shqyrtoi efektin e vendosjes së blloqeve prej druri, rreth 20 centimetra të larta, nën pjesën e kokës së shtratit.
Pjesëmarrësit vlerësuan cilësinë e gjumit dhe iu nënshtruan matjeve të aciditetit në ezofag. Rezultatet treguan se 65 për qind e tyre raportuan gjumë më të mirë.
Ndërkohë, numri i episodeve të zgjatura të refluksit ra nga më shumë se tri gjatë natës në një episod mesatarisht.
Një analizë e publikuar në vitin 2021, e cila përfshiu pesë studime dhe 228 pacientë, arriti në përfundimin se ngritja e pjesës së kokës së shtratit mund të jetë një alternativë e lirë dhe relativisht e sigurt ndaj barnave për disa persona me GERD.
Sipas Dr Albarqouni, provat në dispozicion e paraqesin këtë si një mundësi të thjeshtë dhe me kosto të ulët për njerëzit me simptoma të lehta. Megjithatë, ai vuri në dukje se numri i studimeve mbetet relativisht i kufizuar.
Kjo metodë nuk jep të njëjtin rezultat për të gjithë. Një studim i vitit 2020 përfshiu 39 pacientë që merrnin barna kundër refluksit dhe që fjetën për gjashtë javë në shtretër të ngritur me rreth 20 centimetra në pjesën e kokës.
Studiuesit konstatuan se simptomat e refluksit u përmirësuan, por nuk vunë re një rritje të përgjithshme të cilësisë së jetës.
Për më tepër, më shumë se gjysma e pacientëve raportuan efekte të padëshiruara. Këto përfshinin rrëshqitjen poshtë shtratit gjatë natës, ënjtjen e këmbëve dhe kyçeve për shkak të problemeve me qarkullimin venoz, dhimbje në qafë ose në pjesën e poshtme të shpinës, si dhe probleme intime të shkaktuara nga pjerrësia e shtratit.
Për rreth një të katërtën e pjesëmarrësve, shqetësimet ishin aq të mëdha sa vendosën ta ndërprisnin këtë mënyrë fjetjeje, edhe pse refluksi ishte përmirësuar.
Studiuesit paralajmëruan se numri i lartë i efekteve anësore ngre dyshime nëse përfitimet e ngritjes së shtratit i tejkalojnë gjithmonë shqetësimet që mund të shkaktojë.
Pra, këshilla e Elon Musk nuk është erësisht e pambështetur nga shkenca, por vendosja e librave nën kokë nuk duhet barazuar me ngritjen e kontrolluar të pjesës së sipërme të shtratit. Studimet janë përqendruar kryesisht te ngritja e krevatit, jo te përdorimi i një grumbulli librash si jastëk. /GazetaExpress/
