Ekzekutivi i udhëhequr nga Giorgia Meloni ka shënuar një moment historik në Itali, duke u shndërruar në qeverinë me qëndrueshmërinë më të madhe që nga shpallja e Republikës Italiane.
Të lidhura
None found
Me 1,413 ditë në krye të detyrës, kabineti i saj e ka tejkaluar me një ditë të vetme rekordin e mëparshëm, të cilin e mbante administrata e dytë e Silvio Berlusconit.
Përmes një postimi në rrjetet sociale, Meloni e ka përshëndetur këtë arritje me mirënjohje, por edhe me një ndjesi të thellë përgjegjësie për vijimësinë e mandatit.
“Sot qeveria jonë bëhet qeveria më jetëgjatë në historinë e Republikës Italiane. E mirëpres këtë me mirënjohje dhe një ndjenjë të fortë përgjegjësie.”
Në vlerësimin e kryeministres italiane, fakti që një qeveri qëndron gjatë në pushtet s’duhet reduktuar thjesht në një statistikë politike.
“Stabiliteti nuk është një rekord për t’u mburrur, por kushti që i lejon një kombi të planifikojë, të vendosë, të mbajë angazhimet e tij dhe të respektohet”, nënvizoi ajo.
Giorgia Meloni, e cila në vitin 2022 hyri në histori si femra e parë në krye të qeverisë italiane, tashmë zotëron edhe primatin për mandatin më të zgjatur ekzekutiv në të gjithë historinë e Republikës.
Ekzekutivi i saj u betua më 22 tetor 2022 dhe ka grumbulluar gjithsej 1,413 ditë në post.
Deri më tani, ky rekord i takonte Silvio Berlusconit, qeveria e dytë e të cilit qëndroi në fuqi nga 11 qershori 2001 deri më 23 prill 2005, duke numëruar 1,412 ditë.
Kryeministrja italiane ka theksuar gjithashtu arritjet e qeverisë së saj gjatë këtyre viteve të fundit.
“Në vitet e fundit kemi punuar për të rritur punësimin, për të ulur papunësinë, për të mbështetur familjet dhe bizneset, për të forcuar sigurinë, për të menaxhuar seriozisht financat publike dhe për të rikthyer ndikimin dhe besueshmërinë e Italisë në skenën ndërkombëtare”, deklaroi Meloni.
“Rezultatet janë aty, por ne e dimë shumë mirë se sa shumë mbetet ende për t’u bërë”, shtoi ajo më tej.
Në reagimin e saj, udhëheqësja e ekzekutivit italian i bëri një referencë edhe ciklit të ardhshëm elektoral, që parashikohet të mbahet në pranverë të vitit 2027.
“Vitin tjetër do t’u rikthehemi qytetarëve me atë që kemi bërë, me atë që mbetet për t’u bërë dhe me vizionin tonë për të ardhmen. Dhe ata do të vendosin përsëri nëse ne e meritojmë të vazhdojmë në këtë rrugë”, përfundoi Meloni.
