Donald Trump, presidenti i Shteteve të Bashkuara, aspiron që Gianni Infantino, aktualisht në krye të FIFA-s, të marrë rolin e sekretarit të përgjithshëm të Kombeve të Bashkuara.
Të lidhura
None found
Lajmin e ka publikuar New York Post, duke iu referuar burimeve që pretendojnë se Trump e shikon Infantinon si një profil me autoritet global dhe talent për të krijuar konsensus mes njerëzve.
Po ashtu, raporti thekson se zyrtari i lartë amerikan është i bindur që presidenti i FIFA-s gëzon respekt nga gjithë bota dhe disponon një aftësi të rrallë për të afruar palët. Megjithatë, mbetet e paqartë nëse vetë Infantino ka ndonjë interes për këtë detyrë ose nëse kjo temë është trajtuar mes tyre.
Pasardhësi i Antonio Guterres, mandati i të cilit skadon në fund të dhjetorit, pritet të zgjidhet brenda këtij viti. Procesi kërkon që në fillim 15 anëtarët e Këshillit të Sigurimit të japin dritën jeshile për një kandidaturë dhe më pas ajo duhet të marrë edhe bekimin e Asamblesë së Përgjithshme.
Në shkrimin e New York Post, emri i Infantinos qarkullon midis disa alternativave për postin. Po ashtu, në garë figuron edhe Michelle Bachelet, ish-presidentja e Kilit, së cilës mund t’i duhet të përballet me veton amerikane, si dhe Rafael Grossi, drejtuesi i Agjencisë Ndërkombëtare të Energjisë Atomike, për të cilin artikulli vë në dukje se Mbretëria e Bashkuar mund të shfaqë rezerva për shkak të çështjes së Falklandit.
Nëse Infantino arrin të zgjidhet në këtë pozicion, marrëdhëniet mes administratës së Trump dhe OKB-së mund të pësojnë një përmirësim, shkruan më tej raporti. Kujtojmë që Trump ka mbajtur një qëndrim shpesh kritik ndaj organizatës, duke e etiketuar atë si jo mjaftueshëm efikase në zgjidhjen e krizave globale.
