Uashingtoni i ka kërkuar Teheranit që të dalë publikisht dhe të garantojë se Ngushtica e Hormuzit mbetet e hapur për lundrim, si edhe të angazhohet për ndalimin e sulmeve ndaj anijeve tregtare, pas incidenteve të fundit në këtë korridor detar me rëndësi strategjike.
Të lidhura
None found
Sipas raportimeve të mediave amerikane, SHBA-ja ka dërguar përmes ndërmjetësve rajonalë një mesazh ku kërkon nga Irani jo vetëm të sigurojë lirinë e lëvizjes së anijeve në Ngushticën e Hormuzit, por edhe të pranojë publikisht se goditjet ndaj anijeve tregtare ishin pasojë e një gabimi.
Kjo kërkesë vjen pasi në fillim të kësaj jave u sulmuan tre anije cisternë komerciale, duke rritur ndjeshëm tensionet mes Uashingtonit dhe Teheranit. Sipas mediave amerikane, zyrtarë iranianë u kanë bërë me dije homologëve të tyre amerikanë se të shtënat ndodhën gabimisht dhe se përgjegjësia i atribuohet një grupi të brendshëm të linjës së ashpër.
Raportimet e CBS News thonë se Teherani ua ka pranuar privatisht këshilltarëve të Trump se ngjarja ishte një gabim, ndërsa ka shfaqur edhe gatishmëri për të vazhduar negociatat. Një zyrtar amerikan citohet të ketë deklaruar se pala iraniane është kthyer në tryezën e bisedimeve duke marrë përsipër përgjegjësinë për incidentin.
Presidenti amerikan Donald Trump tha se sulmet e Iranit nënkuptojnë fundin e armëpushimit, por nënvizoi se përpjekjet për bisedime me qëllim mbylljen e konfliktit do të vazhdojnë. Në anën tjetër, ministri i Jashtëm i Iranit, Abbas Araghchi, ka akuzuar SHBA-në për shkeljen e marrëveshjes.
Ndërkohë, në Oman pritet të mbërrijnë zëvendëspresidenti JD Vance, sekretari i Shtetit Marco Rubio, i dërguari special Steve Witkoff dhe Jared Kushner për zhvillimin e bisedimeve diplomatike. Po ashtu, edhe ministri i Jashtëm iranian Abbas Araghchi ndodhet në Oman, ku po zhvillon takime me zyrtarë vendas.
Në të njëjtën kohë, një delegacion nga Katari zhvilloi bisedime në Iran me synimin për të zbutur tensionet dhe për të ndihmuar lundrimin në Ngushticën e Hormuzit, një rrugë detare nga e cila kalon rreth 20 për qind e tregtisë globale të naftës dhe gazit natyror të lëngshëm.
