Pesëmbëdhjetë vjet pasi Saab prodhoi automjetin e saj të fundit, këtë muaj nga uzina e Trollhättan do të dalin edhe njësitë e fundit të mbijetuara. Një grup i vogël makinash zhvillimore dhe prototipesh do të ofrohet në ankand, duke shënuar një tjetër kapitull përmbyllës në lamtumirën e gjatë të kësaj marke dikur ikonike.
Mes tyre gjenden disa automjete vërtet të veçanta.
Të lidhura
None found
Në ankand janë përfshirë tetë makina që janë ruajtur në një ish-kompleks të Saab në Suedi. Pjesa më e madhe e tyre mbështetet te Saab 9-3 dhe janë zhvilluar pas falimentimit të kompanisë.
Pas rrëzimit të Saab, NEVS (National Electric Vehicle Sweden), një kompani e krijuar në vitin 2012, tentoi të rindërtonte trashëgiminë inxhinierike të saj në fushën e teknologjisë elektrike dhe autonome, por ligjërisht nuk u lejua të përdorte emrin Saab. Për një periudhë u duk se kjo përpjekje ringjalljeje mund të funksiononte, por në fund projekti dështoi.
Me mbështetjen e gjigandit kinez të pasurive të paluajtshme Evergrande, NEVS kaloi vite duke zhvilluar automjete elektrike, sisteme autonome dhe sisteme eksperimentale të fuqisë, derisa kolapsi financiar i Evergrande e ndali të gjithë projektin. Në vitin 2023 pasuan shkurtime masive të vendeve të punës dhe që prej asaj kohe fabrika është boshatisur gradualisht.
Ndër ekzemplarët më interesantë përmendet një automjet autonom në zhvillim, si edhe një tjetër prototip i pajisur me motorë elektrikë. Po ashtu, pjesë e këtij grupi është edhe një makinë testuese me një hibrid me rreze të zgjatur veprimi, së bashku me disa sedanë 9-3 para-prodhimi nga epoka e NEVS.
Ankandi do të mbahet nga 21 deri më 30 maj në shtëpinë suedeze të ankandeve Klaravik, ndërsa asnjë prej ekzemplarëve nuk do të ketë çmim rezervë. Para mbylljes së ofertave më vonë këtë muaj, entuziastët do të kenë mundësi të vizitojnë edhe fabrikën në Trollhättan. /Indeksonline/
