Një raketë balistike me kokë luftarake artificiale është testuar nga Kina në Oqeanin Paqësor, vetëm disa orë pasi Australia dhe Fixhi firmosën një marrëveshje të re në fushën e mbrojtjes.
Të lidhura
None found
Ngjarja ka shtuar tensionet në hapësirën Indo-Paqësore, ku përplasja strategjike mes Pekinit dhe Kanberrës vijon të thellohet.
Autoritetet kineze thanë se lëshimi i raketës ishte pjesë e programit të zakonshëm vjetor të stërvitjeve ushtarake dhe se nuk synonte asnjë shtet apo objektiv të veçantë. Pavarësisht kësaj, ministrja e Jashtme e Australisë, Penny Wong, e përshkroi testin si një veprim destabilizues, duke nënvizuar se rritja e kapaciteteve ushtarake të Kinës po shoqërohet me mungesë transparence dhe po krijon pasiguri në rajon.
Po atë ditë, Australia dhe Fixhi zyrtarizuan Aleancën e Oqeanit të Paqësorit, që përbën traktatin e parë të mbrojtjes për Fixhin dhe të katërtin për Australinë, pas marrëveshjeve me Shtetet e Bashkuara, Zelandën e Re dhe Papua Guinenë e Re.
Kryeministri australian Anthony Albanese deklaroi se mbi një miliard dollarë australianë do të investohen gjatë dhjetë viteve të ardhshme për luftën kundër krimit ndërkombëtar, përforcimin e sistemit shëndetësor dhe zhvillimin e infrastrukturës në Fixhi. Sipas tij, ky traktat përfaqëson një nga nismat më të rëndësishme të Australisë me një partner të rajonit.
Edhe kryeministri i Fixhit, Sitiveni Rabuka, e cilësoi këtë marrëveshje si një moment historik në raportet mes dy vendeve, duke theksuar se ajo nuk ka për qëllim të dëmtojë marrëdhëniet e Fixhit me Kinën.
Që prej vitit 2022, Australia ka intensifikuar përpjekjet për të konsoliduar partneritetet e saj në Paqësor, pas nënshkrimit nga Kina të një pakti sigurie me Ishujt Solomon. Ky hap shkaktoi shqetësim në Canberra dhe te aleatët e saj për mundësinë e ngritjes së një baze ushtarake kineze në rajon.
Si pjesë e kësaj qasjeje, Australia ka firmosur së fundmi edhe një partneritet strategjik me Vanuatun, ndërsa po zhvillon bisedime për marrëveshje të reja me Ishujt Solomon dhe vende të tjera të Paqësorit. Anthony Albanese pritet të vijojë turneun e tij diplomatik në rajon me vizita në Ishujt Solomon, Tonga, Samoa dhe Papua Guinea e Re.
Gara për ndikim mes Australisë dhe Kinës në Indo-Paqësor mbetet një nga çështjet më të rëndësishme gjeopolitike, teksa të dyja vendet vazhdojnë të zgjerojnë praninë e tyre ushtarake dhe diplomatike në ishujt e Paqësorit.
