Katër pjesëtarë të një familje me banim në qytetin e Shkodrës; nëna 39-vjeçare Alma Arrazi bashkë dhe tre fëmijët e saj të moshës 9, 8 dhe 3 vjeç, dyshohet se janë vetëmbytur në ujrat e Lumit Buna. Sipas policisë vendore të Shkodrës “hetimet e thelluara kanë zbardhur një rast të dhunës në familje, që ka shkaktuar vetëvrasje”.
Dyshimet e para lindën pas gjetjes së trupit të pajetë të vajzës 9-vjeçare, për të cilën policia konfirmoi në mesditë se, “nga kqyrja paraprake në prani të ekspertëve mjeko-ligjor, nuk janë konstatuar shenja dhune”. Forcat e policisë vendore dhe polumbarët e forcave RENEA po vazhdojnë prej disa orësh kërkimet përgjatë Lumit Buna, në përpjekje për të gjetur edhe trupat e tre pjesëtarëve të tjerë të kësaj familje, pasi dyshohet se edhe ato janë mbytur.
Ndërkohë, një grup hetimor po merr në pyetje të afërm të familjes Arrazi, për të zbardhur rrethanat e ngjarjes, e cila cilësohet si më e rënda që ka ndodhur vitet e fundit brenda familjes. Nëna e fëmijëve është larguar nga banesa bashkë me tre fëmijët e saj më datën 2 maj dhe policia dyshon se shkak është bërë dhuna e ushtruar nga bashkëshorti, i identifikuar si 31 vjeçari me emrin Ergys Arrazi.
Policia e Shkodrës u vu në lëvizje për gjetjen e nënës dhe tre fëmijëve pas kallzimit të bërë një ditë më pas, me 3 maj, nga bashkëshorti dhe baba i fëmijëve. 31-vjeçari Arrazi, është ndaluar tashmë nga policia me akuzën e “shkaktimit të vetëvrasjes si pasojë e dhunës së ushtruar”. Sipas policisë, ai ka qenë i dënuar më parë për kultivim të bimëve narkotike.
Rastet e dhunës në familje vazhdojnë të shtohen në Shqipëri, megjithë ashpërsimin e ligjit për dhunën në familje. Sipas të dhënave zyrtare nga Ministria e Brendshme, gjatë vitit 2023 u regjistruan 4798 raste të dhunës në familje me 2030 autorë të identifikuar nga policia, ku 733 prej tyre u arrestuan dhe dënuan nga drejtësia. Ndërsa pjesa më e madhe janë gjykuar në gjendje të lirë. Por, organizatat joqeveritare pohojnë se përmasat e dhunës në familje janë edhe më të mëdha se ato që deklarojnë strukturat shtetërore. Sipas organizatave joqeveritare, vitin e kaluar në Shqipëri humbën jetën 19 persona për shkak të dhunës me bazë gjinore./ VOA
