Kryeministri Albin Kurti ka njoftuar për takimin që mbajti sot në mëngjes me emisarin e BE-së, Miroslav Lajçak.
Ai tha se në takim ka theksuar që është e nevojshme që marrëveshja të zbatohet në tërësi, derisa ka kërkuar që Serbia të mbahet përgjegjëse për shkeljet e saj.
“Mirëprita Përfaqësuesin Special të BE-së, Miroslav Lajçak në zyrat tona të qeverisë. Theksova nevojën që Marrëveshja Themelore të zbatohet në tërësi dhe nevojën që BE-ja ta mbajë Serbinë përgjegjëse për shkeljet e vazhdueshme të asaj Marrëveshjeje”, ka shkruar Kurti në Twitter.
Welcomed EU Special Representative Miroslav Lajčák (@MiroslavLajcak) at our govt offices today. I emphasized the need for the Basic Agreement to be implemented in its entirety, and the need for the EU to hold Serbia accountable for the persistent violations of that Agreement. pic.twitter.com/hUcwS2JA6t
— Albin Kurti (@albinkurti) May 11, 2023
Ndërkaq, Lajçak në një konferencë për media pas takimit me Kurtin, tha se qëllimi i vizitës së tij është që te dakordohen për hapat e ardhshëm të dialogut.
Ai tregoi se do të ketë një takim në Bruksel Bislimi-Petkoviq, derisa njoftoi se pas Prishtinës do të shkojë edhe në veri të vendit për të kuptuar situatën atje.
“Ne kemi marrëveshjen dhe aneksin, prandaj duhet të kemi një mirëkuptim të qartë të hapit të parë, të dytë dhe të tretë. Ky është qëllimi. Në këtë pasdite do të shkoj edhe në veri të Kosovës. Dua të kem një pikëpamje të dorës së parë të situatës atje dhe shpresoj që të ketë një zgjidhje politike për t’u fokusuar plotësisht në normalizim”.
“Ne mund të kemi vetëm normalizim ose konfrontim. Ne definitivisht do të fokusohemi në normalizim, prandaj duhet të shmangim një deeskalim apo konfrontim”.
Lajçak tha se do të dëgjohë edhe perspektivën e kryetarit të Mitrovicës së Jugut, Bedri Hamza.
Emisari europian u pyet edhe për Asociacionin dhe atë se çka është e pranueshme për BE-në.
“Lehtësuesit janë për të gjetur një mes dhe këtë saktësisht do të bëjmë këtë. Ajo që është e pranueshme për BE-në është e bazuar në normat dhe vlerat europiane, që janë në përputhje me modelet ekzistuese europiane”.
Lajçak nuk deshi të përgjigjet në disa pyetje të gazetarëve, duke thënë se në këtë pikë nuk dëshrion të dërgojë mesazhe.
Pas Kosovës, Lajçak do të shkojë edhe në Serbi./Express/
