Zhvillimet politike në vend, qëndrueshmëria e institucioneve, sundimi i ligjit dhe zhvillimi ekonomik ishin në qendër të takimit ku ministrja e Industrisë, Ndërmarrësisë, Tregtisë dhe Inovacionit, Mimoza Kusari-Lila, priti drejtuesin e Misionit të EULEX-it, Antero Lopes.
Njoftimi i MINTI-t bën të ditur se bashkëbiseduesit trajtuan nevojën për një mjedis të sigurt, që mundëson investimet dhe ushtrimin e aktivitetit ekonomik.
Të lidhura
None found
Në diskutimet për zhvillimin industrial, vëmendja u përqendrua posaçërisht te programet e ministrisë dhe te projekti i ndërtimit të eko-parqeve industriale në Kosovë.
Gjatë takimit, Kusari-Lila u ndal edhe te përparimi i arritur në fushën e rendit dhe ligjit në mbarë territorin e Kosovës. Ajo foli gjithashtu për fuqizimin e institucioneve që kanë përgjegjësi të garantojnë sigurinë dhe stabilitetin.
Ministria theksoi se institucionet e Kosovës vijojnë të kenë ndër përparësitë e tyre një klimë më të favorshme për investimet, shtimin e mirëqenies ekonomike, mirëqeverisjen dhe përparimin e demokracisë.
