Kryeministri Hristijan Mickoski deklaroi sot se sistemi pensional në vend është i qëndrueshëm dhe i sigurt, duke u bërë thirrje pensionistëve të mos shqetësohen. Sipas tij, për momentin nuk parashikohet rritje e moshës së pensionimit.
Të lidhura
None found
Mickoski tha se Qeveria i shqyrton të gjitha propozimet dhe vërejtjet që lidhen me reformat, por vendimi përfundimtar i takon asaj. Ai nënvizoi se qëndrueshmëria financiare nuk duhet të sigurohet përmes kufizimit të të drejtave të qytetarëve, por duke identifikuar fondet që keqpërdoren dhe duke i orientuar ato drejt nevojave reale.
Në këtë kuadër, kryeministri iu referua reformës në sektorin e mbrojtjes sociale, ku, sipas tij, janë konstatuar parregullsi të rëndësishme.
“Kemi përfitues fantom ose përfitues që, sipas të gjitha parametrave, nuk duhet të jenë përfitues të ndihmës minimale të garantuar ose të sigurimit social. Kjo nuk është një shumë e vogël parash, nëse e analizoni në bazë vjetore, do të arrini në një shifër midis një miliard dhe një miliard e gjysmë denarë”, u shpreh Mickoski, duke iu përgjigjur pyetjes së një gazetari për nevojën e reformimit të sistemit pensional.
Si tjetër shembull të ndikimit të reformave të Qeverisë, ai përmendi SHA EMV. Mickoski tha se në disa sektorë të kompanisë po zhvillohen inspektime të detajuara, ndërsa rezultatet financiare kanë ndryshuar: nga një humbje prej 180 milionë eurosh në të kaluarën, kompania tashmë ka shënuar bilanc pozitiv në tre tremujorët e parë të këtij viti dhe një fitim prej rreth 6.5 milionë eurosh./Telegrafi/
