Departamenti amerikan i Drejtësisë ka kërkuar të përfshihet në betejën ligjore të Elon Musk dhe platformës X kundër gjobës prej 120 milionë eurosh, ose 105 milionë paundësh, të vendosur nga Bashkimi Evropian për përdorimin e shenjave blu të verifikimit.
Të lidhura
None found
Kërkesa është depozituar në Gjykatën e Përgjithshme të BE-së, ku SHBA-ja synon të mbështesë përpjekjet e Musk dhe X për rrëzimin e vendimit të Komisionit Evropian.
Sipas DOJ-së, Statuti i Gjykatës së Drejtësisë së BE-së lejon ndërhyrjen e një shteti në një çështje gjyqësore kur ai mund të dëshmojë se ka “interes në rezultatin e çështjes”.
Departamenti amerikan argumenton se Uashingtoni “ka një interes të qartë” për të garantuar që vendimet e Komisionit të merren dhe zbatohen në përputhje me “mënyrën se si juridiksioni territorial kuptohet përgjithësisht në të drejtën ndërkombëtare”.
Gjithashtu, SHBA-ja kërkon që vendimi të mos dëmtojë në asnjë formë shërbimet dixhitale me seli në Amerikë, të cilat, sipas saj, “kontribuojnë ndjeshëm” në ekonominë amerikane.
Të enjten, ndihmësprokurori i përgjithshëm amerikan Brett A. Shumate akuzoi Komisionin Evropian se kishte “tentuar në mënyrë të papërshtatshme” të zgjeronte juridiksionin e vet mbi kompani amerikane që ndodhen jashtë kontrollit të tij.
Gjobën, e njoftuar në dhjetor 2025, Komisioni Evropian e lidhi me mënyrën se si X përdor shenjat blu. Sipas tij, platforma “i mashtron përdoruesit” duke u dhënë mundësi personave të paguajnë për verifikimin, pa “verifikuar në mënyrë kuptimplotë” identitetin e mbajtësit të llogarisë.
Rregullatorët evropianë e akuzuan gjithashtu X për mungesë transparence rreth reklamave dhe për pengimin e studiuesve që kërkonin akses në të dhëna publike.
Kur u vendos gjoba, Henna Virkkunen, nënkryetarja ekzekutive e Komisionit përgjegjëse për sovranitetin teknologjik, tha se institucioni po “e mbante X përgjegjës për cenimin e të drejtave të përdoruesve dhe shmangien e përgjegjësisë”.
“Mashtrimi i përdoruesve me shenjat blu të verifikimit, fshehja e informacionit mbi reklamat dhe përjashtimi i studiuesve nuk kanë vend në hapësirën online të BE-së”, u shpreh ajo.
Musk, i cili shpenzoi miliona dollarë për të ndihmuar në zgjedhjen e Donald Trumpit dhe republikanëve të tjerë, ka deklaruar më herët se rregullat evropiane për teknologjinë “pengojnë përparimin” e kompanive.
Sekretari amerikan i Shtetit, Marco Rubio, si dhe Komisioni Federal i Komunikimeve, FCC, e kanë kritikuar rregullatorin evropian, duke e akuzuar për sulm dhe censurim të kompanive amerikane.
“Gjoba e Komisionit Evropian nuk është thjesht një sulm ndaj X; është një sulm ndaj të gjitha platformave amerikane të teknologjisë dhe popullit amerikan nga qeveritë e huaja”, shkroi Rubio në një postim në X.
Ai shtoi: “Ditët e censurimit të amerikanëve online kanë përfunduar.”
Musk e ripostoi deklaratën e Rubios dhe e shoqëroi me komentin: “Absolutisht.”
Komisioni Evropian ka mohuar se po synon një kombësi të caktuar, duke thënë se po mbron standardet e veta digjitale dhe demokratike, ndërsa synon të ruajë rolin e BE-së si pikë referimi globale.
Ky ishte vendimi i parë zyrtar i Komisionit për mospërputhje me rregullat në kuadër të Aktit të Shërbimeve Digjitale, DSA-së, një prej dy paketave të detyrueshme që rregullojnë platformat online në Bashkimin Evropian.
Ndërkohë, BE-ja po kryen edhe hetime të tjera ndaj X. Mes tyre është edhe një procedurë për asistentin e integruar me inteligjencë artificiale, Grok, për shkak të shqetësimeve se ai është përdorur për krijimin e imazheve të seksualizuara të personave realë.
/BBC/
