BDI-ja pretendon se VLEN-i është përfshirë nga paniku dhe, për këtë arsye, vijon të publikojë të ashtuquajtura anketa të fabrikuara, me synimin për të krijuar përshtypjen e një epërsie që, sipas saj, nuk ekziston te qytetarët.
Të lidhura
None found
“Edhe kësaj radhe, ‘rezultatet’ janë paraqitur nga një agjenci së cilës i mungon transparenca bazë. Nuk bëhet e ditur se kush e ka porositur dhe financuar anketën, në ç’mënyrë është përzgjedhur mostra, kur është zhvilluar puna në terren dhe si kanë qenë të formuluara pyetjet e plota.
Pasi për dy vjet nuk ka shfaqur ndonjë veprimtari serioze publike në fushën e matjes së opinionit, kjo agjenci aktivizohet papritur pikërisht në momentin kur VLEN-it i nevojiten shifra për të mbuluar rënien e tij politike.
Pas kësaj agjencie qëndron Vesna Kuzmanoviq, një emër që ngre dyshime të forta se nuk bëhet fjalë për matje të opinionit publik, por për një operacion propagandistik. Qëllimi është t’i ndërtohet VLEN-it një realitet i rremë dhe të paraqitet si faktor, ndonëse qytetarët, sipas BDI-së, tashmë e kanë kuptuar dobësinë dhe nënshtrimin e tij.
VLEN-i mund të nxjerrë edhe nga një anketë në ditë, por nuk mund ta manipulojë vullnetin e qytetarëve. Përmes grafikëve nuk mund të mbulohen servilizmi në Qeveri, degradimi i përfaqësimit shqiptar dhe poshtërimi i përditshëm që ky koalicion e pranon në heshtje.
Kemi të bëjmë me material propagandistik të një koalicioni të frikësuar, i cili e di fare mirë se çfarë e pret”, thuhet në reagimin e BDI-së.
