Një marrëdhënie nuk merr fund domosdoshmërisht nga një konflikt i madh. Shpesh, ajo nis të shpërbëhet kur mes partnerëve veniten respekti, komunikimi dhe përkujdesja.
Të lidhura
None found
Martesat përballen natyrshëm me periudha të mira dhe të vështira, por disa mënyra sjelljeje shihen si paralajmërime se lidhja mund të mos zgjasë. Kjo temë nxiti një diskutim të gjerë në Reddit, pasi një përdorues pyeti se cila është shenja e parë që tregon se një çift do të divorcohet, ndonëse partnerët mund të mos e kenë kuptuar ende.
Diskutimi mori mijëra reagime. Mes përgjigjeve spikatën përvoja personale, por edhe vëzhgime të njerëzve nga profesione të ndryshme, përfshirë avokatë divorcesh dhe fotografë dasmash.
Një sinjal i hershëm, sipas shumë komentuesve, është mënyra se si dikush e përshkruan partnerin kur ky i fundit nuk ndodhet aty.
Një përdorues vërejti se nuk premton asgjë të mirë kur çdo bisedë për bashkëshortin ose bashkëshorten përqendrohet vetëm tek acarimi që ai person shkakton.
Thënë ndryshe, nëse respekti mungon në bisedat private, vështirë se ai mund të ruhet në praninë e partnerit, transmeton Telegrafi.
Një tjetër problem i rëndësishëm lidhet me temat thelbësore që çiftet nuk i diskutojnë përpara martesës.
Një komentues solli shembullin e dy partnerëve që u ndanë më pak se një vit pas dasmës, pasi nuk kishin biseduar asnjëherë për planet e përbashkëta.
Gruaja synonte të rikthehej në vendlindje dhe të krijonte familje sa më parë. Burri, ndërkohë, dëshironte të qëndronte në qytetin e madh dhe të shijonte jetën pa fëmijë.
Sipas përdoruesit, shumë njerëz besojnë se marrëveshja për çështje të tilla do të arrihet gjatë rrugës, por në të vërtetë janë pikërisht këto mospërputhje që shpesh çojnë në shkatërrimin e martesës.
Edhe mungesa e debateve nuk nënkupton medoemos se marrëdhënia është e shëndetshme. Një koment që tërhoqi shumë vëmendje theksonte se qetësia mund të ekzistojë vetëm sepse njëri prej partnerëve ka hequr dorë tërësisht nga shprehja e ndjenjave dhe nevojave të veta.
Nga jashtë, një çift i tillë mund të duket se jeton në harmoni, ndërsa heshtja në të vërtetë mund të fshehë dorëzimin e njërit prej partnerëve.
Edhe sjellja gjatë dasmës mund të zbulojë probleme që nuk janë vënë re gjatë viteve të lidhjes.
Një ish-fotograf dasmash tregoi se kishte konstatuar një model të përsëritur gjatë dhjetë viteve të punës së tij. Shumë prej çifteve që ai kishte fotografuar ishin divorcuar më vonë dhe, sipas tij, në përgjithësi bëhej fjalë për ata që i kushtonin më shumë rëndësi fotografive sesa vetë dasmës.
Një përdorues tjetër solli në kujtesë rastin e një dhëndri që i përplasi tortë në fytyrë nuses, megjithëse ajo i kishte kërkuar paraprakisht që të mos e bënte.
Nusja përfundoi duke qarë në banjë, teksa përpiqej të rregullonte grimin. Dhëndri ishte aq i dehur sa nuk arriti as ta kuptonte veprimin e tij, ndërsa martesa e tyre përfundoi me divorc pas 14 muajsh.
Ndër përgjigjet më të shpeshta ishte edhe largimi gradual i partnerëve nga përditshmëria e përbashkët.
Ai shoqërohet vetëm me miqtë e vet, kurse ajo vetëm me rrethin e saj. Partnerët nuk i njohin shoqëritë e njëri-tjetrit, nuk ulen bashkë për të ngrënë, flenë në dhoma të veçanta dhe kalojnë shumë pak kohë si çift.
Sipas një prej komenteve, çdo marrëdhënie mbështetet te respekti. Në çastin kur ai humbet, martesa praktikisht ka marrë fund, edhe nëse partnerët nuk e kanë kuptuar ende.
Një reagim që mori vëmendje të veçantë erdhi nga një avokat me 18 vjet përvojë në të drejtën familjare.
Ai tha se një çift që nuk arrin të komunikojë me çiltërsi dhe sinqeritet për paratë nuk do të vazhdojë të qëndrojë i martuar, një përfundim që e kishte nxjerrë gjatë 18 viteve të praktikës.
Bazuar në përvojën e tij, çështjet financiare renditen mes shkaqeve më të zakonshme që krijojnë distancë ndërmjet partnerëve.
Një tjetër përdorues e përmblodhi të gjithë dinamikën duke thënë se njëri prej partnerëve merr rolin e prindit, ndërsa tjetri shndërrohet në një fëmijë shtesë.
Shumë komentues vlerësuan se një raport i tillë e zbeh tërheqjen me kalimin e kohës dhe sjell një nivel të lartë frustrimi.
Problem bëhet edhe mënyra se si zhvillohen konfliktet. Një model që shpesh kalon pa u vënë re shfaqet kur partnerët nuk debatojnë më për ta kuptuar njëri-tjetrin.
Një përdorues e përshkroi si momentin kur gjatë një zënke kupton se personi përballë nuk kërkon më të dëgjojë këndvështrimin tënd, por synon vetëm të dalë fitues.
Në atë pikë, diskutimi nuk bëhet më për gjetjen e një zgjidhjeje, por për të provuar se cili prej të dyve ka të drejtë.
Udhëtimet e përbashkëta u përmendën gjithashtu si një provë domethënëse për cilësinë e marrëdhënies.
Sipas shumë përdoruesve, nëse partnerët nuk arrijnë të shkojnë mirë as gjatë pushimeve, ka pak gjasa që të funksionojnë më mirë në rutinën e zakonshme.
Një tjetër sinjal shfaqet kur imazhi i krijuar në rrjetet sociale merr më shumë rëndësi sesa marrëdhënia reale.
Disa komentues vunë në dukje se çiftet që përpiqen vazhdimisht të bindin publikun se janë të lumtura mund të përballen me probleme serioze larg kamerave. Ata bëjnë përpjekje të tepruara për t’u paraqitur të tjerëve një jetë të përkryer.
Vëmendje të madhe morën edhe shakatë e përsëritura rreth ndarjes. Një prej përgjigjeve paralajmëronte se, kur një çift bën vazhdimisht humor me divorcin, herët ose vonë njëri prej partnerëve mund të mos jetë më duke bërë shaka.
Në fund, shumë pjesëmarrës në diskutim ranë dakord për një tregues tjetër që pothuajse nuk gabon asnjëherë: apatinë.
Sipas tyre, martesa zakonisht nuk shembet nga një grindje e vetme dhe e madhe. Fundi afrohet më shpesh kur njërit prej partnerëve nis të mos i interesojë më asgjë.
