Fjetja me shpinë nga partneri nuk është domosdoshmërisht tregues i ftohjes apo i largimit emocional. Shpesh, ky pozicion lidhet thjesht me nevojën për rehati, temperaturë më të përshtatshme dhe hapësirë personale gjatë gjumit.
Të lidhura
None found
Mund të ndodhë që të shtriheni pranë partnerit me dëshirën për t’u afruar, por pas pak minutash ai të kthehet në anën tjetër. Një reagim i tillë mund t’ju bëjë të pyesni veten nëse ka ndonjë problem në marrëdhënien tuaj.
Megjithatë, përgjigjja nuk është medoemos po.
Pozicioni që një çift mban gjatë gjumit nuk mund të shërbejë si matës i saktë i dashurisë, intimitetit apo cilësisë së lidhjes. Studimet kanë evidentuar vetëm një lidhje të kufizuar mes mënyrës se si çiftet pozicionohen në shtrat dhe gjendjes së marrëdhënies, ndërsa ekspertët e gjumit vënë në dukje se komoditeti fizik shpesh ka ndikim më të madh.
Një përqafim gjatë gjithë natës mund të duket romantik, por mund të mos jetë zgjedhja më praktike për trupin. Krahu mund të mpiret, qafa të tendoset, ndërsa shpina dhe shpatullat mund të mos mbështeten siç duhet.
Për këtë arsye, kthimi në anën tjetër të shtratit mund të jetë vetëm një përpjekje për të gjetur pozicionin që i mundëson trupit të çlodhet. Gjatë natës, njerëzit ndryshojnë pozicion disa herë, shpesh pa qenë të vetëdijshëm, dhe këto lëvizje nuk lidhen patjetër me ndjenjat ndaj personit që ndodhet pranë.
Një tjetër faktor mund të jetë nxehtësia. Kur dy trupa qëndrojnë të mbështetur për shumë orë, temperatura rritet dhe kjo mund të bëhet e parehatshme, veçanërisht në netët e ngrohta.
Të kthyerit me shpinë mund të krijojë distancën e nevojshme që trupi të freskohet. Në mënyrën e gjumit mund të ndikojnë gjithashtu gërhitja, lëvizjet e shpeshta të partnerit, ndriçimi në dhomë ose shqetësimet në shpinë dhe qafë, transmeton Telegrafi.
Madje, në disa raste, ky pozicion mund të tregojë edhe se personi ndihet i sigurt në marrëdhënie. Kur dikush ka besim te partneri, nuk ka gjithmonë nevojë të ruajë kontaktin fizik gjatë gjithë natës. Ai mund të krijojë pak hapësirë dhe të flejë i qetë, duke e ditur se personi i dashur ndodhet pranë.
Kjo do të thotë se dy njerëz mund të flenë në drejtime të kundërta dhe, megjithatë, të jenë emocionalisht shumë të lidhur. Hapësira mes tyre mund të jetë një kompromis i heshtur: dashuria mbetet, por edhe gjumi i rehatshëm ka rëndësi.
Kërkesa për një pozicion më pak intim gjatë gjumit mund të jetë veçanërisht e zakonshme te çiftet që kanë kaluar më shumë kohë së bashku. Një studim ka treguar se çiftet që bashkëjetojnë dhe flenë në shtretër më të mëdhenj priren të zgjedhin pozicione më pak të afërta në çastin kur bien në gjumë.
Vëmendje më e madhe duhet t’i kushtohet jo vetë kthimit me shpinë, por ndryshimeve të tjera që mund ta shoqërojnë atë.
Nëse partneri është bërë papritur më i ftohtë, shmang kontaktin fizik, nuk kërkon më afërsi, komunikimi mes jush është dobësuar, debatet janë shtuar ose gjatë ditës ndieni një largësi emocionale, atëherë duhet parë situata në tërësi.
Cilësia e marrëdhënies dhe gjumi mund të ndikojnë te njëri-tjetri. Një rishikim sistematik i 62 studimeve, ku morën pjesë mbi 43 mijë persona, gjeti se marrëdhëniet më të mira shoqërohen me gjumë më cilësor, ndërsa konfliktet e shpeshta lidhen me probleme më të mëdha të gjumit.
Megjithatë, vetëm fakti që partneri fle me shpinë nga ju nuk mjafton për të nxjerrë përfundime për lidhjen.
Nëse gjatë ditës mes jush ka dashuri, respekt, komunikim, humor dhe dëshirë për të kaluar kohë së bashku, nuk ka arsye ta shihni pozicionin e gjumit si një kërcënim për marrëdhënien.
Ndonjëherë, mesazhi i trupit mund të jetë fare i thjeshtë: “Të dua, por tani dua vetëm të fle pak më rehat.” /Telegrafi/
