Brigjet perëndimore të Meksikës u goditën sot nga një tërmet i fuqishëm me magnitudë 7.4 të shkallës Rihter, njoftoi Shërbimi Gjeologjik i Shteteve të Bashkuara (USGS).
Të dhënat e para tregojnë se epiqendra e lëkundjeve ishte rreth 71 kilometra në jugperëndim të Puerto Madero, në shtetin Chiapas. Thellësia fokale është vlerësuar në afro 10 kilometra.
Të lidhura
None found
Pas goditjes sizmike, Qendra Amerikane e Paralajmërimit për Cunami në Paqësor (PTWC) paralajmëroi se zonat bregdetare në një distancë deri në 300 kilometra nga epiqendra mund të preken nga valë cunami.
Lëkundjet u regjistruan edhe në Guatemalën fqinje dhe në El Salvador. Në kryeqytetin e Guatemalës, godinat u tundën me forcë, çka i detyroi banorët të dilnin me shpejtësi në rrugë. Mediat lokale kanë publikuar pamje nga evakuimi i një ndërtese qeveritare.
Në rrjetet sociale qarkullojnë video ku shihen ndërtesa që lëkunden fuqishëm gjatë tërmetit. Disa prej tyre krijojnë përshtypjen sikur “kërcejnë”, për shkak të intensitetit të lëkundjeve.
Deri në këtë moment, autoritetet nuk kanë bërë të ditur viktima apo dëme të konsiderueshme materiale. Shërbimet e emergjencës vijojnë të monitorojnë situatën.
