Pronarja 42-vjeçare e një çerdheje dhe një edukatore 24-vjeçare janë vendosur në arrest shtëpie në Itali, pasi dyshohen për keqtrajtim të fëmijëve dhe ushtrim të profesionit pa autorizimin e nevojshëm.
Të lidhura
None found
Hetimi lidhet me një çerdhe në provincën e Monzës dhe Brianza-s, ku qëndronin fëmijë nga disa muajsh deri në 3 vjeç. Sipas dyshimeve, atyre nuk u siguroheshin siç duhet ushqimi dhe uji.
Veprimet hetimore janë zhvilluar nga Skuadra Mobile e Komisariatit të Monzës. Autoritetet dyshojnë se në institucion përdoroheshin metoda ndëshkuese degraduese, ndërsa kujdesi ndaj fëmijëve ishte i mangët dhe sjellja ndaj tyre shpesh e papërshtatshme.
Masa e sigurisë u zbatua në orët e para të mëngjesit të së hënës, më 10 gusht. Ajo ishte firmosur nga gjyqtari i hetimeve paraprake në Monza, me kërkesë të Prokurorisë.
Hetimi, i nisur në muajin prill, nxori në pah se edukatorja 24-vjeçare kishte nisur punë që në muajin janar pa zotëruar kualifikimin e kërkuar profesional. Sipas hetuesve, pronarja e kishte punësuar në këto kushte për rreth shtatë muaj.
Edukatorja dyshohet gjithashtu se ka përdorur kontakte fizike tepër të forta dhe të papërshtatshme ndaj disa fëmijëve, të cilët shfaqnin shenja shqetësimi. Reagimet e disa prej tyre pas një denoncimi shërbyen si shtysë për nisjen e hetimeve.
Në të njëjtin hetim janë përfshirë edhe dy edukatore të tjera, përkatësisht 32 dhe 49 vjeç. Për to janë mbledhur elemente të dyshuara, por deri tani nuk është vendosur asnjë masë sigurie.
Policia ka kontrolluar banesat e të dyshuarave në provincat e Monzës dhe Brianza-s, Bergamos dhe Parmës.
Kontrolle janë kryer edhe në ambientet e çerdhes, ku dyshohet se kanë ndodhur episodet, me synim sigurimin e provave të tjera. Hetimet vijojnë për të sqaruar plotësisht rrethanat e ngjarjes dhe përgjegjësitë e personave të përfshirë.
