Ndikuesi kontrovers, Andrew Tate thuhet se është arrestuar në Rumani si pjesë e një hetimi për trafikim njerëzor dhe përdhunim. Tate, i cili u arrestua së bashku me vëllain e tij Tristan, iu nënshtrua bastisjes së shtëpisë së tij në Bukuresht. Avokati i vëllezërve konfirmoi ndalimin e tyre, raporton Reuters.
Vëllezërit ishin nën hetim që nga prilli së bashku me dy shtetas rumunë. Videoja e shpërndarë gjerësisht në mediat sociale duket se tregon Tate dhe vëllain e tij duke u larguar nga një vilë luksoze.
“Katër të dyshuarit … duket se kanë krijuar një grup krimi të organizuar me qëllim të rekrutimit, strehimit dhe shfrytëzimit të grave duke i detyruar ato të krijojnë përmbajtje pornografike që synohet të shihet në faqet e internetit të specializuara për një kosto,” thanë prokurorët, sipas Reuters.
Drejtoria e Rumanisë për Hetimin e Krimit të Organizuar dhe Terrorizmit (DIICOT) lëshoi një deklaratë, por nuk përmendi emrat e vëllezërve Tate, duke deklaruar se dy shtetas britanikë dhe dy rumunë dyshoheshin se ishin pjesë e një grupi kriminal të fokusuar në trafikimin e qenieve njerëzore.
Ish-kikboksieri u bë i famshëm në vitin 2016 kur u largua nga emisioni televiziv britanik Big Brother për shkak të një videoje që dukej se e tregonte atë duke sulmuar një grua. Ai vazhdoi të fitonte famë në internet, me Twitter që e ndaloi atë pasi tha se gratë duhet të “mbajnë përgjegjësi” për sulmet seksuale.
