Ministri në detyrë i Mbrojtjes, Ejup Maqedonci, deklaroi se Ilir Konushevci ishte një prej themeltarëve të Ushtrisë Çlirimtare të Kosovës dhe një ndër figurat më të rëndësishme në organizimin e luftës për liri.
Në postimin e tij të plotë, Maqedonci bëri të ditur se sot, në përvjetorin e lindjes së Heroit të Kombit, Ilir Konushevci, u bënë homazhe dhe u vendosën lule pranë bustit të tij në Kazermën “Adem Jashari” në Prishtinë, në nderim të jetës, veprës dhe sakrificës së njërit prej heronjëve më të shquar të Kosovës.
Të lidhura
None found
Ai theksoi se me përkushtimin, trimërinë dhe dashurinë për atdheun, Ilir Konushevci dha një kontribut të jashtëzakonshëm në rrugën e popullit tonë drejt çlirimit. Sipas tij, vepra e Konushevcit vazhdon të jetë frymëzim për brezat e sotëm dhe për ata që do të vijnë, si dëshmi se liria është një vlerë që fitohet dhe ruhet me sakrificë.
Maqedonci shtoi se, duke e kujtuar Ilir Konushevcin në ditëlindjen e tij, shprehet mirënjohja dhe respekti më i thellë për veprën e tij të pavdekshme. “Heronjtë nuk vdesin kurrë. Ata kanë vetëm ditëlindje. Lavdi e përjetshme Heroit të Kombit, Ilir Konushevci!”, thuhet në postim.
