Sulmet ruse me dronë ndaj Ukrainës kanë vijuar gjatë natës, edhe pse Vladimir Putin kishte deklaruar se Kievi nuk do të sulmohej për 72 orë.
Të lidhura
None found
Rajoni i Zaporizhzhias u përfshi nga goditjet, ku një burrë 74-vjeçar humbi jetën dhe tre persona të tjerë u plagosën, njoftuan autoritetet ukrainase. Sulmet shkaktuan gjithashtu dëme në ndërtesa banimi.
Goditje pati edhe në zonën përreth kryeqytetit, në rajonin e Kievit. Autoritetet bënë të ditur se në një territor të gjerë shpërthyen zjarre, të cilat u vunë nën kontroll gjatë orëve të mëngjesit.
Edhe rajoni i Dnipropetrovskit u përfshi në valën e sulmeve. Sipas Forcave Ajrore të Ukrainës, Rusia lëshoi gjithsej 108 dronë, prej të cilëve 82 u rrëzuan nga mbrojtja ajrore. Autoritetet thanë se shpërthime ose goditje u raportuan në të paktën 11 zona të vendit.
Operacionet ruse nuk janë ndalur as gjatë mëngjesit. Pauza 72-orëshe e shpallur nga Putin për Kievin përkon me një periudhë të rëndësishme diplomatike, pasi të dërguarit e presidentit amerikan Donald Trump, Steve Witkoff dhe Jared Kushner, pritet të udhëtojnë drejt kryeqytetit ukrainas.
