Përfaqësuesit e Partisë Demokratike të Kosovës dhe të Aleancës u mblodhën sërish para godinës së ekzekutivit të premten në mëngjes, duke vijuar thirrjet që kryeministri në detyrë, Albin Kurti, të marrë pjesë në seancën parlamentare për themelimin e legjislaturës së re.
Të lidhura
None found
Kësaj here, të pranishëm ishin edhe përfaqësues të zgjedhur në pushtetin vendor, konkretisht këshilltarët komunalë nga Prizreni dhe Suhareka.
Dardan Berisha, asamblist i PDK-së në Suharekë, mori fjalën i pari dhe e kritikoi ashpër Kurtin për mungesë përkrahjeje ndaj komunave.
Ai theksoi se administrata e kaluara, megjithëse kishin fonde më të limituara, arritën të nxisnin zhvillimin e vendit. Sipas tij, buxheti aktual nuk po shpërndahet në nivel lokal dhe qeveria po synon të centralizojë pushtetin komunal.
Adem Morina, këshilltar i PDK-së në Prizren, e cilësoi bllokimin e buxheteve komunale si një veprim të pajustifikueshëm dhe një njollë të rëndë për imazhin e vendit para partnerëve ndërkombëtarë.
Ai u shpreh se kjo bllokadë e ushtruar nga Kurti nuk po dëmton vetëm institucionet qendrore, por po paralizon të gjitha mekanizmat lokalë. Morina e quajti këtë sjellje të panevojshme dhe të dëmshme për qytetarët dhe kërkoi zhbllokimin e menjëhershëm të shtetit.
Ndërkohë, Genc Prelvukaj nga kryesia e PDK-së u përqendrua te vështirësitë që po kalojnë shtresat e ndryshme të popullsisë për shkak të qëndrimeve të shefit të ekzekutivit.
Ai deklaroi se për Lëvizjen Vetëvendosje dhe Kurtin, prioritet nuk është mirëqenia e qytetarëve, por përplasja me opozitën. Prelvukaj përmendi rëndimin e krizës ekonomike për familjet, mungesën e mjeteve të punës dhe sakrificat e përditshme të policëve e minatorëve, duke theksuar se e vetmja gjë që i intereson partisë në pushtet është shfryrja e egos dhe konflikti politik në vend të kompromisit.
Deputetja e Aleancës, Time Kadrijaj, ngriti akuza të rënda ndaj liderit të Vetëvendosjes, duke pohuar se ai po zhvillon një luftë hibride kundër oponencës përmes grupeve paramilitare me emrat “Lule” e “Gjela”.
Ajo shtoi se këto llogari anonime përdoren për të denigruar dhe frikësuar këdo që nuk është pjesë e Lëvizjes Vetëvendosje. Kadrijaj e sfidoi hapur Kurtin, duke i thënë se nuk do të frikësohet dhe se trimat e vërtetë dalin me identitete reale. Ajo paralajmëroi se me avancimin e teknologjisë, autorët e këtyre fushatave do të zbulohen dhe se disa tashmë janë penduar para organeve të drejtësisë.
Aksioni i deputetëve të PDK-së dhe Aleancës ka hyrë tashmë në javën e katërt, me kërkesën kryesore për konstituimin e menjëhershëm të Kuvendit dhe krijimin e institucioneve të reja.
