Agjencia për Shërbime Mediale Audio dhe Audiovizuale ka reaguar ndaj deklaratave të MMA-së dhe MRT-së, duke i cilësuar të pasakta dhe të pambështetura pretendimet për trajtimin e shërbimeve programore Arena M1, Arena M2 dhe Arena M3 Premium si kanale të huaja që ritransmetohen në Republikën e Maqedonisë së Veriut.
Të lidhura
None found
Sipas ASHMA-së, të gjitha veprimet në këtë rast janë ndërmarrë në përputhje me kompetencat e përcaktuara në Ligjin për Shërbimet Mediale Audio dhe Audiovizuale.
Agjencia sqaron se vlerësimi është mbështetur në dokumentacionin përkatës, si edhe në të dhënat dhe informacionet e siguruara nga institucionet kompetente të Republikës së Maqedonisë së Veriut dhe subjektet përkatëse të huaja.
Në bazë të materialeve të shqyrtuara, Arena M1, Arena M2 dhe Arena M3 Premium konsiderohen shërbime programore të huaja që ritransmetohen dhe jo shërbime televizive vendase që transmetojnë programe brenda territorit të vendit. Kjo lidhet me faktin se sinjali i tyre burimor nuk transmetohet në territorin e Republikës së Maqedonisë së Veriut.
ASHMA i ka mohuar gjithashtu akuzat se vendimet e saj krijojnë mundësi për shmangien e detyrimeve ligjore, si dhe pretendimet për paligjshmëri në veprimet e Agjencisë apo të zyrtarëve të saj.
“Nëse MMA dhe MRT kanë prova të dyshuara për veprime të paligjshme nga Agjencia, u bëjmë thirrje atyre që t’ua paraqesin ato institucioneve kompetente. Ndërkohë, theksojmë se është e papranueshme të përhapen kualifikime dhe aludime të pabaza që krijojnë përshtypjen e veprimeve të paligjshme ose arbitrare nga rregullatori vetëm për hir të interesave të veta”, thuhet në reagimin e ASHMA-së.
