Familjarët e pilotit grek që humbi jetën pas rrëzimit të helikopterit në Greqi do t’u drejtohen organeve të drejtësisë për të kërkuar sqarimin e plotë të rrethanave të aksidentit fatal.
Të lidhura
None found
Nëna dhe motra e tij kanë autorizuar një studio ligjore që të ndërmarrë procedurat e nevojshme pranë Prokurorisë së Athinës. Synimi i tyre është të përcaktohen shkaqet e sakta të vdekjes së pilotit dhe të mbajnë përgjegjësi të gjithë personat që mund të kenë ndikuar në ngjarje.
Studioja ligjore njoftoi se gjatë orëve në vijim do të dorëzohet një kallëzim penal në mbështetje të akuzave kundër kujtdo që do të rezultojë përgjegjës.
“Nëna dhe motra e pilotit të ndjerë grek të helikopterit Bell, i cili operonte në zonën e Porto Germenos, kanë autorizuar studion tonë ligjore të ndërmarrë të gjitha veprimet e nevojshme ligjore pranë Prokurorisë së Athinës, me qëllim zbardhjen e plotë të rrethanave që çuan në vdekjen e padrejtë të djalit dhe vëllait të tyre, Aristotelit, si dhe ndëshkimin e përgjegjësve”, deklaroi studioja.
Përfaqësuesit ligjorë sqaruan gjithashtu se do të paraqitet një deklaratë në mbështetje të akuzës ndaj çdo personi që mund të ketë kontribuar në vdekjen e pilotit, qoftë përmes veprimeve apo mosveprimeve.
Sipas familjes, piloti ishte një profesionist i përkushtuar, i cili u përball me vetëmohim me zjarret për të mbrojtur jetën dhe pronat e qytetarëve.
