Autoritetet iraniane kanë varur dy persona të akuzuar se kanë spiunuar në favor të Izraelit. Ekzekutimet janë pjesë e një fushate që, sipas grupeve të të drejtave të njeriut, po mbështetet shpesh në akuza të paqarta për sigurinë kombëtare dhe nuk ka shfaqur shenja frenimi që prej nisjes së luftës me Shtetet e Bashkuara dhe Izraelin.
Të lidhura
None found
Agjencia Mizan, e cila kontrollohet nga gjyqësori iranian, njoftoi se Omid Behzad dhe Puria Safvat u ekzekutuan në orët e para të 3 gushtit.
Sipas agjencisë, dy burrat i kishin dhënë Mossadit, shërbimit izraelit të inteligjencës, “ndihmë të konsiderueshme” për realizimin e objektivave të tij gjatë konfliktit të qershorit 2025, të cilin Teherani e quan Lufta 12-Ditore, si dhe gjatë konfliktit në vazhdim, të nisur më 28 shkurt.
Mizan pretendoi se Behzadi dhe Safvati u kishin përcjellë oficerëve të Mossadit, si edhe kanaleve të komunikimit të lidhura me këtë shërbim, koordinata, fotografi dhe të dhëna për objekte ushtarake e të sigurisë.
Gjyqësori iranian deklaroi se dyshimet ndaj tyre u ngritën nga Organizata e Inteligjencës e Gardës Revolucionare Islamike (IRGC), e cila thuhet se monitoroi sjelljen e mediave me bazë jashtë Iranit, disa kanaleve informative dhe modelin e videove të dërguara prej tyre.
Autoritetet thanë se “ekzaminimet teknike” të telefonit të Behzadiut zbuluan aktivitetin e pretenduar dhe se ai e pranoi atë “gjatë hetimeve”. Megjithatë, nuk është e qartë se në çfarë rrethanash është marrë kjo deklaratë. Organizatat për të drejtat e njeriut prej vitesh e akuzojnë Iranin për nxjerrjen e rrëfimeve nën detyrim.
Agjencia Mizan shtoi se Behzadi kishte “pranuar në mënyrë të qartë” se përdorte “aplikacione për gjetjen e vendndodhjes, si Google Maps”, për të identifikuar dhe shënuar koordinatat e lokacioneve të ndryshme.
Ndërkohë, Safvati u akuzua për “bashkëpunim të drejtpërdrejtë me Mossadin”, por raporti nuk paraqiti prova për këtë pretendim.
Që prej 28 shkurtit, kur nisi lufta me Shtetet e Bashkuara dhe Izraelin, në Iran është shtuar numri i ekzekutimeve të personave që grupet e të drejtave të njeriut i klasifikojnë si të burgosur politikë. Në mesin e tyre janë protestues, persona të dyshuar si pjesëtarë të organizatave të ndaluara dhe të dënuar për spiunazh.
Disa organizata të të drejtave të njeriut raportojnë se prej fillimit të luftës janë ekzekutuar më shumë se 50 persona të akuzuar për çështje politike dhe sigurie, ndërsa organizata të tjera japin një vlerësim edhe më të lartë.
Akuzat që autoritetet iraniane kanë përdorur në këto raste përfshijnë spiunazhin për shtete armiqësore, bashkëpunimin me Izraelin dhe Shtetet e Bashkuara, moharebeh (armiqësi ndaj Zotit), si dhe rebelimin e armatosur përmes anëtarësimit në Mojahedin-e Khalq, organizata opozitare në mërgim.
Në një deklaratë të publikuar më 27 korrik, ekspertët e Kombeve të Bashkuara e akuzuan Republikën Islamike se po përdor ekzekutimet për të “mbjellë frikë në mbarë shoqërinë, të pengojë protestat e ardhshme dhe të heshtë kundërshtimin”. Ata paralajmëruan gjithashtu: “Megjithatë, shtypja vetëm sa krijon më shumë kundërshtim.”
Të dhënat më të fundit të verifikuara tregojnë se gjatë këtij viti në Iran janë ekzekutuar 433 persona. Shumë prej tyre ishin dënuar me vdekje për çështje që lidhen me protestat e janarit, gjatë të cilave mijëra njerëz u vranë nga forcat e sigurisë dhe dhjetëra mijëra të tjerë u arrestuan.
Organizatat për të drejtat e njeriut dhe vëzhguesit ndërkombëtarë kanë ngritur pikëpyetje mbi drejtësinë e proceseve gjyqësore, duke përfshirë pretendimet për rrëfime të detyruara dhe kufizime në qasjen ndaj një procesi të rregullt ligjor./ REL
