Epidemiologu Dragan Danillovski ka sqaruar në një postim në rrjetet sociale se tetë rastet e konfirmuara deri tani me ethet e Nilit Perëndimor në Maqedoni nuk pasqyrojnë pamjen reale të përhapjes së virusit. Sipas tij, këto të dhëna nuk duhen lexuar sikur të gjithë të prekurit zhvillojnë forma të rënda të sëmundjes.
Të lidhura
None found
Të gjithë pacientët e identifikuar deri në këtë fazë kanë manifestuar variantin neuroinvaziv të infeksionit. Danillovski shpjegon se këto episode janë më të dukshmet dhe futen lehtësisht në raportimet zyrtare, ndërkohë që një numër shumë më i lartë rastesh mbetet jashtë statistikave sepse nuk diagnostikohen. Natyra e virusit është e tillë që afërsisht 80 për qind e personave të infektuar nuk shfaqin asnjë shenjë klinike. Rreth 20 për qind përjetojnë një gjendje të lehtë gripale me temperaturë, ndërsa forma e rëndë neuroinvazive prek më pak se një për qind të të prekurve, kryesisht të moshuarit dhe individët me patologji kronike ose me imunitet të kompromentuar.
“Tetë rastet e rënda të evidentuara janë vetëm maja e dukshme e ‘ajsbergut’ epidemiologjik. Poshtë kësaj sipërfaqeje fshihet një numër i madh infeksionesh që nuk japin simptoma ose kalojnë në forma të buta e jo specifike, të cilat nuk njihen dot si ethe të Nilit Perëndimor,” thekson epidemiologu.
Ai paralajmëron se në mungesë të informacionit të detajuar, opinioni publik mund të krijojë bindjen e gabuar se virusi shkakton sëmundje të rëndë te të gjithë ata që infekton, madje se është bërë më agresiv. Një përfundim i tillë, shton Danillovski, nuk mbështetet nga njohuritë aktuale shkencore.
