Autoritetet franceze kanë nisur hetim formal ndaj një zjarrfikësi vullnetar 18-vjeçar, i cili dyshohet se qëndron pas zjarrit të madh që përfshiu pyllin Fontainebleau, në jug të Parisit.
Të lidhura
None found
Flakët kanë shkrumbuar më shumë se 2,000 hektarë sipërfaqe pyjore, ndërsa rreth 1,000 banorë janë detyruar të largohen nga banesat e tyre. Si pasojë e situatës, është bllokuar pjesërisht edhe autostrada kryesore veri-jug e Francës.
Prokurorja Diane Ngomsik bëri të ditur se i riu kishte pranuar në fillim se kishte vënë zjarrin në disa degë duke përdorur çakmak dhe benzinë, por më vonë ka tërhequr deklaratën e tij. Për të njëjtin rast po hetohet edhe një tjetër 18-vjeçar. Kjo fazë e sistemit penal francez mund të pasohet me akuza zyrtare dhe një proces gjyqësor.
Ndonëse zjarri është frenuar, autoritetet theksojnë se ai nuk është shuar ende tërësisht. Presidenti Emmanuel Macron, gjatë një vizite në zonën e dëmtuar, deklaroi se nuk do të tolerohen zjarrvënësit dhe lavdëroi angazhimin e zjarrfikësve. Ai nënvizoi gjithashtu se deri më tani nuk ka pasur viktima.
Sipas Macron, afërsisht 10% e pyllit Fontainebleau është përfshirë nga flakët. Kjo zonë, ku gjenden Pallati dhe Parku i Fontainebleau, është një prej hapësirave natyrore dhe historike më të rëndësishme të Francës. Pallati dhe Parku i Fontainebleau janë pjesë e Trashëgimisë Botërore të UNESCO-s që prej vitit 1981.
Që nga nisja e vitit, në Francë janë regjistruar afro 11,000 zjarre, sipas autoriteteve. Sikurse shumë shtete të tjera evropiane, vendi është përballur me temperatura të larta dhe episode të pazakonta të të nxehtit.
Të dhënat e shërbimit klimatik Copernicus tregojnë se Evropa është kontinenti me ngrohjen më të shpejtë në botë, me një ritëm rreth dy herë më të lartë se mesatarja globale. Rritja e temperaturave po nxit valë më të forta të të nxehtit, po ushtron presion mbi rezervat ujore dhe po shton zjarret në pyje.
Këtë verë, zjarre të mëdha janë shënuar edhe në Spanjë, ku kanë humbur jetën të paktën 13 persona. Ndërkohë, në Skocinë verilindore, zjarrfikësit vijojnë përpjekjet për të kontrolluar një zjarr të përhapur në Parkun Kombëtar Cairngorms.
