Gjatë seancës parlamentare të sotme, deputeti socialist Damian Gjiknuri njoftoi se Komisioni i Reformës Zgjedhore do të kërkojë zyrtarisht një shtyrje të afatit të punimeve.
Ai theksoi se çështja e numërimit elektronik është përfshirë nga një klimë e tensionuar, ndonëse vetë forcat politike kishin kërkuar më parë një prani më të madhe të teknologjisë në proceset zgjedhore. Sipas tij, ekzekutivi ka treguar prej kohësh vullnetin për të mbuluar financiarisht kalimin e plotë në votim elektronik për zgjedhjet e ardhshme parlamentare.
Të lidhura
None found
Gjiknuri bëri të ditur se në mbledhjen e radhës, komisioni do të parashtrojë kërkesën për vazhdimin e afatit. Ai vlerësoi punën e kryer deri tani, por pranoi se ka patur vështirësi të shkaktuara nga përplasjet politike.
Duke iu drejtuar opozitës, deputeti theksoi se zgjedhjet mbeten e vetmja rrugë për të kapërcyer konfliktet dhe se pa një reformë që adreson rekomandimet e OSBE-së, nuk ka alternativë tjetër. Ai i ftoi përfaqësuesit e opozitës të paraqesin sugjerimet e tyre, duke siguruar se mazhoranca nuk ka imponuar asnjë rregull dhe nuk ka ndërmend ta bëjë këtë, duke u lënë hapësirë të lirë për të zgjedhur.
