Policia e Trafikut në Ohër ka bërë të ditur për publikun, në veçanti për drejtuesit e mjeteve, se nga dita e sotme ka nisur vendosja graduale e sistemit bashkëkohor të monitorimit të komunikacionit “Safe City” në zonën që mbulon Policia e Trafikut e Ohrit. Ky sistem ishte promovuar zyrtarisht më 01.02.2026, ndërsa sot, pas testimit përfundimtar, ekipet e ekspertëve aktivizuan kamerat e sigurisë në segmentin e autostradës pranë Novo Sellës, në Komunën e Debërcës.
Sipas njoftimit, në fazën që vjen, projekti “Safe City” pritet të vihet në funksion edhe në aksin rrugor mes fshatrave Gorenci dhe Trebenishtë, si edhe në rrugë të tjera me qarkullim më të dendur dhe në korridoret 8 dhe 10, brenda zonës së Policisë së Trafikut të Ohrit.
Të lidhura
None found
Autoritetet sqarojnë se pajisjet tashmë janë të instaluara, por ende nuk vendosin sanksione, pasi ndodhen në procesin e kontrollit dhe testimit teknik përfundimtar.
Me këtë sistem synohet mbikëqyrje më efikase dhe e pandërprerë e trafikut, ulje e numrit të aksidenteve në rrugë, identifikim i shkeljeve të rregullave të komunikacionit, rritje e disiplinës në trafik dhe një shkallë dukshëm më e lartë e sigurisë rrugore.
“U bëjmë thirrje shoferëve të respektojnë rregullat dhe rregulloret e trafikut dhe t’i kushtojnë vëmendje të veçantë limitit të lejuar të shpejtësisë, i cili në këtë pjesë të autostradës është 100 kilometra në orë”, thonë nga Policia e Rrugës së Ohrit./Telegrafi/
