Presidenti i Francës, Emmanuel Macron, i ka dërguar një paralajmërim presidentit të Iranit, Ebrahim Raisi, në lidhje me pasojat e furnizimit me dron në Rusi.
Ai gjithashtu i kërkoi Teheranit t’i japë fund ndihmës për Moskën në luftën e saj kundër Ukrainës.
Në komunikimin e tij telefonik me presidentin iranian, Emmanuel Macron paralajmëroi për seriozitetin e pasojave, si në fushën e sigurisë ashtu edhe në atë humanitare, të dërgimit të dronëve në Rusi dhe bëri thirrje për përfundimin e menjëhershëm të ndihmës iraniane për luftën e agresionit të Moskës kundër Ukrainës, njoftoi Presidenca franceze.
Presidenti francez shprehu gjithashtu shqetësime për drejtimin e programit bërthamor të Teheranit dhe “kujtoi vullnetin e Francës dhe partnerëve të saj evropianë për të gjetur një zgjidhje diplomatike për këtë çështje”.
Ai nënvizoi rëndësinë që Teherani të marrë masa konkrete dhe të verifikueshme de-përshkallëzimi dhe të zbatojë, plotësisht dhe pa vonesë, detyrimet e tij ndërkombëtare, si dhe angazhimet që ka bërë ndaj Agjencisë Ndërkombëtare të Energjisë Atomike (IAEA) më 4 mars.
Një zëdhënës i Shtëpisë së Bardhë paralajmëroi dje se Rusia po blen materiale nga Irani për të ndërtuar një fabrikë për drone në tokën e saj dhe se objekti ka të ngjarë të jetë funksional në fillim të vitit të ardhshëm.
Shtetet e Bashkuara besojnë se deri në maj, Rusia kishte marrë qindra dronë sulmues iranianë dhe akuzon Moskën se i ka përdorur së fundmi për të sulmuar Kievin dhe për të terrorizuar popullsinë ukrainase.
Teherani ka thënë vazhdimisht se akuzat e SHBA për dërgimin e armëve në Rusi “janë të pabaza” dhe se ai nuk është i përfshirë në luftën në Ukrainë.
