Kryeministri Hristijan Mickoski tha se prodhimi industrial po shfaq prirje pozitive dhe se qarkullimi në industri është rritur me mbi 5,5% në krahasim me tremujorin e tretë të vitit të kaluar. Sipas tij, këta tregues kanë rëndësi të veçantë në kushtet e situatës ekonomike në botë dhe në Bashkimin Evropian, partneri më i madh tregtar i Maqedonisë.
Mickoski u shpreh se shifrat pozitive nuk janë lajm i mirë për ata që, sipas tij, duan që vendi të ketë rezultate të dobëta.
Të lidhura
None found
Ai deklaroi se treguesit mbështesin atë që qeveria kishte thënë që në fillim: nevojitet durim dhe konsolidim gradual i situatës. Pas gati dy vjet e gjysmë, tha ai, vendi ka arritur në pikën zero, pasi më parë ndodhej në deficit të thellë. Sipas kryeministrit, kjo është pika nga e cila duhet të niset kushdo që merr pushtetin, ndërsa tani ai pret vetëm rritje.
Komentet për ekonominë i kundërshtoi kryetari i LSDM-së, Venko Filipçe. Ai tha se Maqedonia e Veriut renditet e 41-ta në Evropë për Prodhimin e Brendshëm Bruto të projektuar për kokë banori dhe se Fondi Monetar Ndërkombëtar ka rrëzuar pretendimet e Mickoskit për ekonominë e tretë në Evropë. Filipçe e cilësoi këtë si gjendjen reale të ekonomisë maqedonase, ndryshe nga ato që i quajti përralla për vendin e tretë dhe gënjeshtra për rritjen më të shpejtë të pagave e pensioneve.
“Çfarë ekonomie e tretë? Maqedonia e Veriut ndodhet në fund të renditjes evropiane. Sipas Fondit Monetar Ndërkombëtar, ajo zë vendin e 41-të mes 48 ekonomive të Evropës për BPV-në e parashikuar për kokë banori. FMN-ja parashikon që kjo vlerë në Maqedoninë e Veriut të jetë 11.762 dollarë. Në rajon, Serbia, Mali i Zi dhe Shqipëria janë përpara nesh. Këtë kemi thënë gjatë vitit të fundit në LSDM dhe tashmë e ka konfirmuar edhe FMN-ja”, tha Filipçe.
Filipçe shtoi se ekonomia e vendit mbetet shumë prapa ekonomive më të pasura të Evropës, ndërsa qytetarët e përjetojnë këtë hendek çdo ditë.
