Willian ka treguar se nisi të mendonte për largimin nga Arsenali vetëm tre muaj pas transferimit, pasi pretendon se Mikel Arteta nuk realizoi ato që i kishte premtuar përpara se të bashkohej me klubin.
Të lidhura
None found
Sipas ish-futbollistit brazilian, trajneri i kishte thënë se do të kishte një rol qendror dhe se skuadra do të ndërtohej duke e pasur atë si një prej figurave kryesore.
Megjithatë, Willian shprehet se nuk kaloi shumë kohë për të kuptuar se situata në klub nuk përputhej me pritshmëritë e krijuara gjatë bisedimeve para transferimit.
“Nuk kam asgjë kundër tij. Në aspektin futbollistik është një trajner i madh dhe idetë që ka janë shumë të mira, por në menaxhimin e ekipit i mungonin disa elementë”, deklaroi Willian në “The Obi One Podcast”.
Braziliani shtoi se Arteta nuk arrinte të sillte në skuadër dimensionin njerëzor që, sipas tij, është i domosdoshëm në marrëdhënien me lojtarët.
“I mungonte ana njerëzore dhe kjo është shumë e rëndësishme. Në fushë është i zoti. Shpesh bëj shaka dhe them se më shitën një ëndërr, por në fund nuk ishte një ëndërr e mirë”, tha ai.
Transferimi i Willianit te Arsenali u krye në verën e vitit 2020, pasi ai u largua nga Chelsea. Megjithatë, qëndrimi i tij në “Emirates” zgjati vetëm një sezon.
Gjatë asaj periudhe, ai luajti 37 ndeshje me klubin londinez dhe realizoi vetëm një gol. Në vitin 2021, palët u ndanë përmes një marrëveshjeje të dyanshme.
Duke shpjeguar çfarë e bindi të kalonte nga pjesa perëndimore në pjesën veriore të Londrës, Willian kujtoi edhe mesazhin që kishte marrë nga Arteta para firmosjes.
“Arteta më tha: ‘Kështu do të luajmë dhe unë dua që ti të jesh lojtari kryesor. Do ta ndërtoj ekipin rreth teje dhe dua të të jap çelësin e klubit’”, rrëfeu ai.
“Kur i dëgjova këto fjalë, sigurisht që e doja Chelsean, por ndodhesha në vitin e fundit të kontratës, isha 32 vjeç dhe po mendoja të qëndroja edhe tri vite në Londër. Familja ime e donte qytetin, ndaj vendosa të vazhdoja jetën në Londër dhe të transferohesha te Arsenali”, përfundoi Willian.
