Shoko Kawata, drejtuesja e qytetit Yawata në prefekturën e Kiotos dhe kryebashkiakja e parë në Japoni që mori leje lindjeje, është përfshirë në listën TIME100 Next të revistës TIME, e cila përzgjedh 100 persona me ndikim dhe potencial në rritje.
Të lidhura
None found
36-vjeçarja u bë nënë për herë të parë më 15 shtator. Zgjedhja e saj për të marrë leje lindjeje hapi një debat në nivel kombëtar në Japoni lidhur me mundësinë që zyrtarët e zgjedhur të pushojnë nga detyra pas lindjes.
Një pjesë e opinionit publik e mbështeti vendimin e Kawata-s, ndërsa kundërshtarët e cilësuan të papërgjegjshëm largimin e saj të përkohshëm nga posti.
Përkrahësit e saj theksuan se shtatzënia dhe prindërimi nuk duhet të përjashtojnë një grua nga karriera politike. Sipas tyre, Kawata e vendosi familjen në një rol të rëndësishëm dhe krijoi një model që mund ta bëjë angazhimin politik më të arritshëm për gra të tjera.
Kritikët argumentuan se zyrtarët e lartë duhet të vazhdojnë të ushtrojnë funksionet e tyre ose të dorëhiqen në rast se nuk janë në gjendje të përmbushin përgjegjësitë. Disa kërkuan gjithashtu reduktimin e pagave të tyre gjatë kohës së lejes.
Në një intervistë për BBC-në, të dhënë para lindjes, Kawata i hodhi poshtë këto kritika. Ajo deklaroi se synon ta vijojë karrierën politike, ndërsa ndërton edhe familjen e saj.
Kryebashkiakja paralajmëroi se gjykimi i grave politikane kur marrin leje lindjeje mund të çojë në përjashtimin e grave në moshë riprodhuese nga funksionet publike.
“Dua të përballem me shumë sfida me të cilat përballen prindërit dhe fëmijët sot nga e njëjta perspektivë, si dikush që i përjeton vetë ato”, tha ajo.
Në Japoni, zyrtarët vendorë të zgjedhur nuk mbulohen nga një kuadër ligjor të njëjtë me atë që u garanton punonjësve të administratës lokale të drejtën për leje lindjeje.
Për të zgjidhur këtë çështje, Kawata hartoi së bashku me zyrën e saj një marrëveshje të posaçme. Për 16 javë, kompetencat e saj iu deleguan zëvendëskryetarit të bashkisë, Shigeto Nose.
Plani parashikonte edhe që Kawata të punonte nga distanca, në rastet kur kjo do të ishte e mundur.
Më 15 shtator, ajo bëri të ditur lindjen e vajzës përmes një postimi në rrjetin social X dhe falënderoi të gjithë ata që e kishin mbështetur. Kawata shtoi se përvoja e saj e re si nënë do të ndikojë edhe në mënyrën se si do të trajtojë çështjet sociale.
