Dy ish-anëtarë të qeverisë së Viktor Orbánit në Hungari janë arrestuar me dyshimin se kanë keqpërdorur fonde publike dhe kanë marrë ryshfete. Ndalimet u kryen vetëm disa orë pasi parlamenti votoi heqjen e imunitetit të tyre.
Të lidhura
None found
Balázs Hankó, i cili ka mbajtur postin e ministrit të Kulturës dhe është deputet i Fidesz-it nacionalist, u arrestua të hënën në mbrëmje nën dyshimet për përvetësim të parave publike. Ai i ka mohuar akuzat.
Ndërkohë, në një çështje të veçantë, në pranga ka përfunduar edhe Miklós Seszták, ish-ministër për Zhvillimin Kombëtar dhe deputet i partisë aleate KDNP. Prokuroria e dyshon për marrje ryshfetesh, ndërsa ai gjithashtu ka deklaruar se nuk ka kryer shkelje.
Këto janë hetimet e para për korrupsion që prekin zyrtarë të rangut të lartë të qeverisë së mëparshme, e cila e drejtoi Hungarinë për më shumë se 16 vjet nën udhëheqjen e Orbánit.
Sipas prokurorëve, Hankó ka pasur rol mbikëqyrës në shpërdorimin e rreth 17.3 miliardë forintëve, shumë kjo që korrespondon me 47 milionë euro, nga Fondi Kombëtar Kulturor i Hungarisë.
Hetuesit dyshojnë se paratë janë orientuar te artistë dhe organizata të lidhura me Fidesz-in, ndërsa një pjesë e tyre dyshohet se është përdorur për fushatën zgjedhore të vitit 2026. Hankó i ka kundërshtuar këto pretendime.
“Ndërgjegjja ime është e pastër, ky është një gjyq spektakël politik”, deklaroi ai në një video të publikuar pak para arrestimit.
Hetimi ndaj Fondit Kombëtar Kulturor kishte marrë një zhvillim të rëndësishëm në korrik, kur policia kontrolloi zyrat e Fidesz-it dhe sekuestroi serverët e partisë.
Në atë kohë, Orbán e sulmoi hetimin, duke e akuzuar qeverinë e re se po përpiqej ta godiste politikisht forcën e tij.
Sa i përket Sesztákut, prokurorët besojnë se ai ka përfituar më shumë se 12 miliardë forintë, ose rreth 32.6 milionë euro, përmes ryshfeteve dhe pagesave që lidhen me tenderët publikë.
Një pjesë e çështjes lidhet me blerjen e autobusëve të përdorur për kompaninë shtetërore hungareze të autobusëve. Autoritetet dyshojnë se çmimet e këtyre mjeteve mund të jenë rritur në mënyrë të paligjshme.
Dosja përfshin edhe projekte të tjera të ndërtimit publik. Seszták, i cili drejtoi Ministrinë për Zhvillimin Kombëtar nga viti 2014 deri në vitin 2018, i ka mohuar akuzat.
