Deputeti i Partisë Demokratike, Luçiano Boçi, deklaroi në emisionin “Now me Erla Mëhillin” se opozita duhet të përcaktojë mënyrën e vijimit të përballjes politike me qeverinë.
Sipas tij, veprimtaria politike e opozitës duhet të ndërthuret me protestën qytetare, ndërsa përballja duhet të shtrihet edhe në forma të tjera të aksionit politik dhe institucional.
Të lidhura
None found
Boçi u shpreh se mosfunksionimi i institucioneve, pavarësisht angazhimit të opozitës, tregon një degradim të plotë të institucioneve të shtetit shqiptar. Ai theksoi se opozita ka njëkohësisht karakter qytetar dhe politik dhe se tashmë është e përfshirë në protestë përmes mbështetjes dhe burimeve të saj.
Deputeti demokrat nënvizoi se kauzat e qytetarëve nuk mund të përvetësohen nga opozita, pasi në protestë janë vetë qytetarët. Sipas tij, detyra e opozitës është të bashkojë lëvizjen e saj politike me atë qytetare, ndërsa në Parlament dhe në institucione duhet të ndërmerren hapa të fortë politikë.
Ai përmendi si forma të mundshme ngujimin, grevën e urisë dhe bllokimin e institucioneve, duke theksuar se këto veprime mund të realizohen vetëm përmes bashkërendimit me protestën qytetare. Boçi tha se Partia Demokratike është pjesë e protestës “me zemër, me njerëz, me komunikime” dhe se veprimet që po ndërmerren sot nga protestuesit janë përdorur edhe më herët nga PD-ja, por në atë kohë janë dënuar.
Deputeti renditi si objektiva të opozitës rrëzimin e qeverisë, zhvillimin e zgjedhjeve të lira dhe të ndershme, si dhe krijimin e një qeverie teknike. Ai shtoi se Edi Rama nuk e pranon këtë qëndrim, ndërsa protestuesit kanë gjetur mënyrën për t’iu përgjigjur dhe për t’i hequr mbështetjen.
