Një grua 37-vjeçare dhe i biri 21-vjeçar janë gjetur të vdekur brenda garazhit të shtëpisë së tyre në qytezën Partiniko, në provincën e Palermos. Dyshimet e para të hetuesve tregojnë se vdekja mund të jetë shkaktuar nga gazrat e grumbulluara në dy depozita nëntokësore.
Të lidhura
None found
Viktimat u identifikuan si Rosalia La Manna dhe djali i saj, Vincenzo Troia. Sipas rindërtimit fillestar të ngjarjes, 21-vjeçari kishte zbritur paraditen e së premtes në njërën prej depozitave për të marrë rrjetat që shërbenin për mbledhjen e ullinjve. Familja i kishte ruajtur ato aty prej rreth një viti.
Duke parë që i biri nuk po kthehej, Rosalia dyshohet se zbriti vetë për ta kërkuar, por mbeti e bllokuar në ambientin e mbushur me gaz. Trupat e tyre u zbuluan më pas në garazh nga persona të tjerë.
Ekspertët mendojnë se dekompozimi i materialeve organike brenda depozitave kishte prodhuar sasi vdekjeprurëse të dioksidit të karbonit. Kur mbërritën në vendngjarje, zjarrfikësit konstatuan se aty brenda mungonte oksigjeni i nevojshëm për të marrë frymë.
Forcat e ndërhyrjes u përballën me rrezik të lartë për shkak të përqendrimit të gazit, prandaj njësiti i specializuar NBCR i zjarrfikësve hyri në zonë i pajisur me bombola oksigjeni. Karabinierët kanë nisur një hetim për të sqaruar rrethanat e plota të tragjedisë dhe për të verifikuar nëse depozitat dhe kushtet e ruajtjes së materialeve bujqësore plotësonin normat e sigurisë.
