Gjykata Rajonale e Mynihut ka konstatuar se kompania Suno, e cila krijon muzikë përmes inteligjencës artificiale, ka cenuar të drejtat e autorit. Ky vendim pritet t’i hapë rrugë një përballjeje më të gjerë ligjore ndërmjet artistëve, botuesve dhe kompanive teknologjike që zhvillojnë modele të AI-së.
Të lidhura
None found
Në vendimin e dhënë të premten, gjykata përcaktoi se Suno nuk kishte të drejtë të përpunonte dhe përdorte muzikën e artistëve që përfaqësohen nga Gema, organizata gjermane përgjegjëse për licencimin e të drejtave muzikore.
Suno duhet të paraqesë të dhëna për fitimet e siguruara nga shfrytëzimi i paautorizuar i materialeve të mbrojtura. Kompania do të detyrohet gjithashtu të paguajë dëmshpërblim, shuma e të cilit do të caktohet në një fazë të mëvonshme.
Çështja mund të dërgohet për apelim në një shkallë më të lartë të gjyqësorit.
Kompania me seli në Massachusetts të SHBA-së u vlerësua në 5.4 miliardë dollarë gjatë një raundi financimi në muajin qershor. Nëpërmjet platformës Suno, përdoruesit mund të prodhojnë këngë me modele të inteligjencës artificiale duke dhënë komanda në formë teksti.
Akuzat për përdorimin e muzikës së mbrojtur pa shpërblyer autorët dhe kompozitorët kanë përfshirë një sërë kompanish që zhvillojnë muzikë me AI. Paditë kolektive ndaj Suno dhe konkurrentit të saj, Udio, mbështeten nga më shumë se 1.800 artistë.
Gjatë vitit të kaluar, Udio zgjidhi mosmarrëveshjet për të drejtat e autorit përmes marrëveshjeve me Universal Music Group dhe Warner Music Group. Edhe Suno, ndërkohë, ka lidhur veçmas një marrëveshje me Warner Music Group.
Vendimi i marrë në Gjermani shihet si një precedent me peshë në diskutimin botëror për mënyrën se si inteligjenca artificiale përdor materiale të mbrojtura dhe për respektimin e të drejtave të krijuesve të përmbajtjes.
