Pak minuta para sfidës Shqipëri–Bjellorusi, të vlefshme për Ligën e Kombeve, presidenti i Federatës Shqiptare të Futbollit, Armand Duka, foli për “TV Klan” nga fusha e stadiumit “Air Albania”.
Të lidhura
None found
Duke komentuar situatën e Kombëtares dhe objektivat në këtë kompeticion, Duka u shpreh se trajneri përbën një element thelbësor të ekipit. Sipas tij, FSHF-ja është përpjekur të bëjë zgjedhjen më të mirë me Maran, duke marrë në konsideratë eksperiencën dhe tiparet e tij.
“Mendoj se Maran është zgjedhja e duhur dhe se ai do të japë maksimumin për ekipin Kombëtar. Çdo ndeshje është e vështirë, ashtu si edhe ajo e sotmja. Është shumë e rëndësishme ta nisim me një rezultat pozitiv, pasi kjo mund të na sjellë një lloj euforie”, deklaroi presidenti i FSHF-së.
Duka theksoi se fitorja nuk do të jetë e lehtë, duke sjellë si shembull ndeshjen e Francës kundër Turqisë mbrëmjen e kaluar, ku turqit i vunë në vështirësi francezët. Ai shtoi se përfshirja e lojtarëve të rinj po ndodh në mënyrë natyrale, me mbështetjen e futbollistëve me më shumë përvojë.
“Jemi pak a shumë në një moment transformimi. Çunat e rinj përkrahen nga lojtarët me përvojë. Sa u përket afrimeve, ky proces nuk është i lehtë për ne. Edhe pasaportizimi ka ndikimin e vet. Shpresoj që ligjet të ndryshojnë”, tha Armand Duka.
