Një drejtues mjeti është ndaluar nga policia pasi është konstatuar se po qarkullonte me 177 kilometra në orë në rrugën Gostivar–Tetovë, në një pjesë të rrugës ku kufizimi i lejuar i shpejtësisë është 80 km/h.
Të lidhura
None found
Ministria e Punëve të Brendshme bëri të ditur se ngjarja është regjistruar sot rreth orës 18:00, në afërsi të kyçjes së Bogovinës, ku efektivët e Njësisë Mobile për Sigurinë në Komunikacion e kanë evidentuar kundërvajtjen me automjetin special për kontrollin e shpejtësisë.
Me urdhër të prokurorit publik, liria i është hequr K.B. (47) nga Tetova, i cili po drejtonte një veturë të markës “Skoda” me targa të Tetovës.
Sipas MPB-së, ndaj tij janë marrë të gjitha veprimet e parapara me ligj dhe ai do të përballet me procedurë penale në bazë të nenit 297-a të Kodit Penal të Maqedonisë së Veriut.
Po ashtu, MPB thekson se kontrollet në trafik do të vijojnë në mbarë territorin e vendit, me synim rritjen e sigurisë në komunikacion dhe ndëshkimin e shkelësve.
Autoritetet u kanë bërë apel të gjithë pjesëmarrësve në komunikacion që t’u përmbahen rregullave të trafikut, në mënyrë që të ndihmojnë në krijimin e rrugëve më të sigurta.
