Deputetja demokrate Ina Zhupa ka ngritur zërin kundër skicës së një reforme të re territoriale, që sipas raportimeve mediatike, synon bashkimin e Bashkive të Delvinës dhe Konispolit me atë të Sarandës. Në reagimin e saj, Zhupa e cilëson këtë lëvizje si një hap të mëtejshëm drejt centralizimit të pushtetit dhe zbrazjes së jugut të Shqipërisë, duke nënvizuar se nuk bëhet fjalë për një riorganizim administrativ, por për heqje të së drejtës së përfaqësimit dhe shërbimeve për banorët.
Sipas saj, Delvina dhe Konispoli janë të rrënjosura thellë në histori, identitet dhe trashëgimi kombëtare, prandaj nuk mund të lejohet zhdukja e tyre si njësi vendore. Ajo i nxit banorët e këtyre dy zonave, pavarësisht ngjyrave politike, të rezistojnë ndaj çdo propozimi që i bashkon me Sarandën.
Të lidhura
None found
Zhupa argumentoi se pasi iu morën institucionet dhe mundësitë e zhvillimit ekonomik, mazhoranca nuk ka tagër t’u heqë tani edhe emrin nga harta e vendit. Ajo e përshkroi këtë si një politikë shpopullimi të shndërruar në akt ligjor. Sipas deputetes, heqja e statusit të bashkive nuk përbën reformë, por konsolidon centralizmin, duke i larguar shërbimet nga qytetarët, duke dobësuar përfaqësimin vendor dhe duke braktisur zona që kërkojnë më shumë vëmendje investimesh, jo një zë më të vakët.
Ajo shtjelloi më tej kronologjinë e braktisjes: “Pasi u mbyllën institucionet, pasi u larguan zyrat shtetërore, pasi u hoqën shërbimet, pasi mijëra të rinj u detyruan të emigrojnë për mungesë mundësish, tani qeveria ka gjetur ‘zgjidhjen’: të heqë edhe statusin e bashkive për Delvinën dhe Konispolin.”
Duke argumentuar për vlerat e patjetërsueshme të zonave, Zhupa theksoi se Delvina përbën një nga qendrat më të hershme historike të Shqipërisë. Ajo ka luajtur një peshë të madhe në historinë, arsimin, kulturën dhe jetën shpirtërore kombëtare, duke qenë shekuj me radhë një nyje administrative dhe ekonomike e krahinës, me tipare të forta patriotike dhe një pasuri kulturore që s’mund të degradohet në një thjesht varësi të një bashkie tjetër.
Për Konispolin, deputetja vuri në dukje se si qyteti më jugor, ka një rëndësi strategjike kombëtare për shkak të pozicionit kufitar, historik dhe lidhjeve me traditën e Çamërisë. Ajo theksoi pasurinë e jashtëzakonshme arkeologjike, kulturore dhe etnografike të zonës, si dhe nevojat specifike që kërkojnë domosdoshmërisht vendimmarrje pranë komunitetit dhe jo nga disa dhjetëra kilometra larg.
Në mbyllje, Znj. Zhupa u bëri thirrje të gjithë banorëve të Delvinës dhe Konispolit të bashkohen kundër këtij plani, pa dallime partiake. Gjithashtu, ajo sfidoi drejtpërdrejt kolegët deputetë socialistë të rajonit të Vlorës që të kundërshtojnë hapur këtë nismë, duke mos e votuar dhe duke refuzuar një plan që vepron kundër interesave të qytetarëve.
