Policia ka vënë në pranga dy doganierë në Durrës për akuzën e kontrabandimit të medikamenteve mjekësore dhe sende të tjera të paligjshme.
Burimet bëjnë me dije se në pranga ka rënë edhe një shofer. Dyshohet se doganierët ashtu edhe shoferi i fugonit kanë shpërdoruar detyrën e tyre.
Fillimisht u arrestuan shtetasit Granit Kerxhaliu, 35 vjeç, banues në Kukës dhe Behar Lleshi, 57 vjeç, lindur në Kosovë dhe banues në Londër, të cilët u ndaluan teksa po lëviznin me një furgon në qytetin e Durrësit, brenda të cilit kishte sasi medikamentesh të ndryshme mjekësore, kamera sigurie dhe Rapid Test Antigen, pa dokumentacionin përkatës të hyrjes në doganë.
Në vijim të veprimeve hetimore, specialistët për Hetimin e Krimeve Ekonomike dhe Financiare arrestuan në flagrancë edhe shtetasit Artan Topuzi, 58 vjeç dhe Enkel Shehi, 52 vjeç, me detyrë doganier në portin e qytetit. Këta shtetas dyshohet se kanë shpërdoruar detyrën duke mos kryer kontrollin e imtësishëm të mjetit ku u gjetën mallrat kontrabandë.
Njoftimi i plotë i policisë:
Finalizohet operacioni policor i koduar “Porosia”, për goditjen e kontrabandës me medikamente mjekësore.
Operacioni nga Sektori për Hetimin e Krimeve Ekonomike dhe Financiare në DVP Durrës.
Vihen në pranga 4 shtetas, 2 prej tyre doganierë.
Sekuestrohen një sasi medikamentesh, kamera sigurie dhe Rapid Test Antigen.
Strukturat për Hetimin e Krimeve Ekonomike dhe Financiare në DVP Durrës, në vijim të punës për parandalimin dhe goditjen e paligjshmërisë, në bazë të informacioneve të mara në rrugë operative se disa shtetas po transportonin medikamente mjekësore dhe sende të tjera të paligjshme, pa dokumentacionin përkatës, kanë organizuar punën dhe kanë finalizuar me sukses operacionin policor të koduar “Porosia”, në kuadër të të cilit u arrestuan në flagrancë për veprat penale “Kontrabanda me mallra të tjera”, “Kontrabanda me mallra të licencuara” dhe “Tregtimi dhe transportimi i mallrave që janë kontrabandë”, shtetasit: G. K., 35 vjeç, banues në Kukës dhe B. Ll., 57 vjeç, lindur në Kosovë dhe banues në Londër.
Shërbimet e Policisë kanë ndaluar në lagjen nr.13, Durrës, një mjet furgon tip “Mercedes Benz”, me drejtues shtetasin G. K. dhe pronar shtetasin B. Ll. Gjatë kontrollit në këtë mjet janë gjetur dhe sekuestruar në cilësinë e provës materiale një sasi medikamentesh të ndryshme mjekësore, kamera sigurie dhe Rapid Test Antigen.
Në vijim të veprimeve hetimore, specialistët për Hetimin e Krimeve Ekonomike dhe Financiare arrestuan në flagrancë edhe shtetasit A. T., 58 vjeç dhe E. Sh., 52 vjeç, me detyrë doganier, të dy banues në Durrës. Këta shtetas dyshohet se kanë shpërdoruar detyrën duke mos kryer kontrollin e imtësishëm të mjetit ku u gjetën mallrat kontrabandë.
Materialet i kaluan Prokurorisë së Rrethit Gjyqësor Durrës, për veprime të mëtejshme. /albeu.com/
