Përpjekjet e administratës amerikane për t’i dhënë fund luftës në Ukrainë kanë hyrë në një fazë të re. Të dërguarit e presidentit Donald Trump, Steve Witkoff dhe Jared Kushner, do të vizitojnë gjatë kësaj fundjave Rusinë dhe Ukrainën, duke marrë me vete një propozim të ri për përfundimin e konfliktit më shumë se 4-vjeçar.
Të lidhura
None found
Takimi i parë pritet të zhvillohet sot në Moskë, ku Witkoff dhe Kushner do të bisedojnë me presidentin rus Vladimir Putin. Të dielën, dy negociatorët amerikanë do të udhëtojnë drejt Kievit për t’u takuar me presidentin ukrainas Volodymyr Zelensky.
“Ata kanë me vete një propozim për t’i dhënë fund luftës”, tha Trump kur u pyet lidhur me misionin e emisarëve të tij. Edhe presidenti Putin ka shfaqur së fundmi një optimizëm të kujdesshëm për mundësinë e arritjes së paqes. Gjatë një forumi ndërkombëtar ekonomik, ai deklaroi se “ka mundësi” që të arrihet një marrëveshje.
Witkoff dhe Kushner janë në krye të përpjekjeve diplomatike të administratës Trump për të ndërmjetësuar një marrëveshje paqeje. Megjithatë, mes Moskës dhe Kievit vijojnë të ekzistojnë mospajtime të mëdha.
Udhëtimi në Ukrainë do të shënojë vizitën e parë të dy negociatorëve amerikanë në kuadër të këtyre bisedimeve, ndërsa në Rusi ata kanë qenë disa herë. Në terren, situata mbetet e tensionuar përpara takimeve. Zelensky njoftoi se një dron rus goditi në Kiev zyrën e Oleksandr Poklad, kreut të Shërbimit të Sigurisë së Ukrainës, SBU.
Poklad nuk raportohet të ketë pësuar dëmtime. Sipas Zelenskyt, ai i ka kërkuar drejtuesit të SBU-së që sulmit t’i përgjigjet “në mënyrë të përshtatshme”. Ndërkohë, autoritetet ukrainase bënë të ditur se një sulm rus në qytetin Kamianske, në rajonin e Dnipropetrovskut, shkaktoi vdekjen e katër personave dhe plagosjen e pesë të tjerëve.
