Nëntë persona humbën jetën dhe 26 të tjerë mbetën të plagosur si pasojë e sulmeve ruse gjatë natës në Ukrainë. Zaporizhia dhe Kievi u goditën nga një valë e re raketash dhe dronësh.
Bilanci më i rëndë u regjistrua në qytetin e madh të Zaporizhias, ku u vranë gjashtë persona dhe u plagosën 19 të tjerë, bëri të ditur kreu i komandës ushtarake rajonale, Ivan Fedorov.
Të lidhura
None found
Pak pas orës 07:00, Fedorov njoftoi në Telegram se numri i të vdekurve ishte rritur nga pesë në gjashtë.
Ai tha se forcat ruse ndërmorën një ofensivë “masive”, duke përdorur raketa dhe bomba të drejtuara të lëshuara nga avionë ushtarakë. Goditjet dëmtuan ndërtesa apartamentesh dhe depo, përfshirë objekte në qendër të qytetit.
Përpara përditësimit të bilancit, Fedorov kishte shpërndarë një fotografi të një automjeti të përfshirë nga flakët pas sulmit.
Goditje u raportuan gjithashtu në rajonin e Dnipropetrovskit, ku ushtria ruse përdori artileri dhe sisteme ajrore pa pilot. Sipas kreut të komandës ushtarake rajonale, Oleksandr Khanza, tre persona u vranë, mes tyre një 15-vjeçar, ndërsa pesë të tjerë u plagosën.
Në zonat e shënjestruara u shkaktuan edhe dëme të tjera, ndërkohë që autoritetet ukrainase vazhdojnë të përcaktojnë përmasat e pasojave.
Gjatë natës u sulmua edhe Kievi. Menjëherë pas aktivizimit të alarmit për një goditje me raketa balistike, pas mesnatës në kryeqytet u dëgjua një varg shpërthimesh.
Gazetarët e AFP konfirmuan shpërthimet në Kiev, ndërsa në një depo shpërtheu zjarr. Deri në këtë fazë është njoftuar për një person të plagosur.
Përmes platformës Max, Ministria ruse e Mbrojtjes deklaroi se objektivat e sulmeve në Kiev dhe Zaporizhia ishin “ndërmarrjet e kompleksit ushtarako-industrial dhe qendrat e transportit dhe logjistikës”.
Në territorin rus, nga ana tjetër e kufirit, një sulm ukrainas me dron la të vdekur një 49-vjeçar dhe plagosi dy persona në rajonin e Voronezhit.
Guvernatori i rajonit, Alexander Gusev, deklaroi se copat e dronëve shkaktuan zjarre në depo. Ai tha se mbrojtja ajrore ruse interceptoi dhe asgjësoi 15 dronë ukrainas mbi qytetin e Voronezhit dhe pesë rrethe të rajonit.
“Një rrëzim droni shkaktoi zjarre në dy depo të një kompanie të madhe”, tha Gusev, pa identifikuar kompaninë në fjalë.
Më herët, Wildberries, një prej platformave më të mëdha të tregtisë online në Rusi, kishte njoftuar evakuimin urgjent të punonjësve nga objektet e saj në rajon, për shkak të shqetësimeve të sigurisë.
Vala e fundit e sulmeve ruse pason deklaratat e presidentit ukrainas, Volodymyr Zelensky, sipas të cilit Moska po përgatitet të dislokojë mijëra trupa të Koresë së Veriut për t’u përfshirë në luftë.
Zelensky ka pohuar gjithashtu se Rusia ka siguruar raketa të reja balistike nga Pheniani.
Gjatë javëve të fundit, forcat ruse kanë intensifikuar përdorimin e raketave balistike. Interceptimi i këtyre armëve mund të bëhet vetëm nga një numër i kufizuar sistemesh të mbrojtjes ajrore që zotëron Ukraina, në veçanti nga sistemet Patriot të prodhuara në SHBA.
Megjithatë, Kievi po përballet me mungesë të raketave PAC-3 për sistemet Patriot. Sipas raportimeve, kjo gjendje është rënduar që prej nisjes së luftës së SHBA-së dhe Izraelit kundër Iranit në fund të shkurtit.
Paralelisht, ushtria ukrainase ka shtuar goditjet ndaj territorit rus, kryesisht përmes dronëve, duke shënjestruar qytete dhe infrastrukturë në largësi të mëdha nga kufiri.
Intensifikimi i operacioneve nga të dyja palët po vazhdon të sjellë viktima dhe dëme, ndërsa lufta mes Rusisë dhe Ukrainës kalon në një fazë tjetër të përshkallëzimit të sulmeve ajrore.
