Pas më shumë se katër dekadash i mbuluar nga uji, një segment i “Hekurudhës së Vdekjes” në Tajlandë është rikthyer në sipërfaqe, duke zgjuar interesin e historianëve, studiuesve dhe turistëve nga mbarë bota.
Zbulimi lidhet me stacionin historik Nithe, që gjatë Luftës së Dytë Botërore shërbente si një pikë kyçe furnizimi me karburant në linjën famëkeqe hekurudhore që bashkonte Tajlandën me Mianmarin. Ai kishte qëndruar nën ujë për rreth 40 vjet, por u bë i dukshëm këtë vit, pasi rezervuari në zonë u tha si pasojë e punimeve të mirëmbajtjes në një digë pranë tij.
Të lidhura
None found
E njohur me emrin “Hekurudha e Vdekjes”, kjo linjë hekurudhore kishte një gjatësi prej rreth 413 kilometrash dhe u bë e njohur edhe nga filmi i vitit 1957 “Ura mbi lumin Kwai”. Emërtimi i saj tragjik lidhet me mijëra njerëz që humbën jetën gjatë ndërtimit.
Ndërtimi i hekurudhës u krye nga tetori 1942 deri në tetor 1943 nga rreth 60 mijë robër lufte aleatë, kryesisht nga Britania e Madhe, Shtetet e Bashkuara dhe Kanadaja, si edhe nga qindra mijëra punëtorë aziatikë që u detyruan të punonin në kushte ekstreme.
Fotografitë e shpërndara nga mediat tajlandeze paraqesin pjesë të shinave origjinale dhe mbetje strukturash që dikur përdoreshin për funksionimin dhe mirëmbajtjen e rrjetit hekurudhor. Sipas ekspertëve, ky zbulim përbën një mundësi të rrallë për të studiuar pjesë autentike të linjës së hershme, pasi shumë stacione të tjera janë shkatërruar ose janë rindërtuar ndër vite.
Studiuesi australian Martyn Fryer, gjyshi i të cilit humbi jetën gjatë ndërtimit të hekurudhës në vitin 1942, tha se kishte provuar disa herë të vizitonte stacionin Nithe, por më parë nuk kishte mundur të shihte strukturat historike për shkak të nivelit të lartë të ujit.
Ekspertët thonë se këtë vit uji ka zbritur në nivelin më të ulët të dekadave të fundit, duke bërë që rrënojat të duken më qartë se asnjëherë më parë. Si rezultat, zona është kthyer në një pikë të rëndësishme interesi për studiuesit e historisë së Luftës së Dytë Botërore dhe për vizitorët që duan të njihen nga afër me një prej kapitujve më tragjikë të historisë së Azisë Juglindore.
