Një shpërthim i fuqishëm goditi të premten një bazë ushtarake në Bolivi, duke shkaktuar viktima, dhjetëra të plagosur dhe dëme të konsiderueshme materiale. Autoritetet kanë paralajmëruar se numri i viktimave mund të rritet.
Të lidhura
None found
Incidenti u regjistrua rreth orës 14:30, sipas kohës lokale, në një regjim artilerie të vendosur në Viacha, rreth 30 kilometra larg La Pazit.
Ministri bolivian i Mbrojtjes, Ernesto Justiniano, njoftoi se 81 persona kanë mbetur të plagosur, ndërsa 14 të tjerë ende nuk janë gjetur. Autoritetet shëndetësore lokale kanë bërë të ditur se bilanci mund të jetë shumë më i rëndë, duke vlerësuar paraprakisht se numri i të vdekurve mund të shkojë nga 10 deri në 15.
Shpërthimi ka dëmtuar edhe dhjetëra banesa pranë kazermës, sipas policisë. Ndërkohë, ekipet e emergjencës po vijojnë punën mes rrënojave për të kontrolluar nëse ka persona të bllokuar.
Banorëve u është kërkuar të qëndrojnë në një distancë prej të paktën 150 metrash nga baza, pasi zyrtarët shëndetësorë kanë paralajmëruar se ekziston ende rreziku i një shpërthimi tjetër.
Të shtunën, komandanti i bazës, koloneli Antonio Amaru, deklaroi se në mesin e 14 personave të zhdukur ndodhen një rreshter dhe 13 ushtarë të rekrutuar, të moshave 18 dhe 19 vjeç.
Policia ka konfirmuar se në ambientet e kazermës mbaheshin fishekzjarre dhe materiale piroteknike. Shkaku që solli shpërthimin, megjithatë, nuk është përcaktuar ende dhe po hetohet.
Presidenti i Bolivisë, Rodrigo Paz, u shprehu mbështetjen familjeve të viktimave dhe të plagosurve. Ai premtoi se incidenti do të hetohet në mënyrë të plotë, teknike dhe transparente.
Pas ngjarjes, autoritetet e Viacha kanë shpallur tre ditë zie. Operacionet e kërkimit dhe shpëtimit vazhdojnë në zonën e prekur.
