Dy zyrtarë amerikanë kanë deklaruar për CNN se Shtetet e Bashkuara janë përpjekur ta vënë Iranin në dijeni për shqetësimet se Izraeli mund të merrte në shënjestër dhe të vriste ndërmjetësuesit iranianë gjatë bisedimeve të zhvilluara këtë pranverë.
Të lidhura
None found
Sipas tyre, në Uashington ekzistonte frika se Izraeli mund të synonte Mohammad Bagher Ghalibaf, kryetarin e parlamentit iranian, i cili ka drejtuar negociatat me SHBA-në, si edhe ministrin e Jashtëm Abbas Araghchi, i cili ka qenë po ashtu një nga figurat publike të këtyre bisedimeve. Këto sinjalizime, thanë zyrtarët, janë dërguar përmes ndërmjetësve.
Raportimin e parë për këto paralajmërime e ka publikuar “New York Times”.
Megjithatë, nuk ka pasur shenja se inteligjenca amerikane zotëronte të dhëna për ndonjë komplot të caktuar që do t’i justifikonte këto paralajmërime. Nga ana tjetër, zyrtarë të lartë të mbrojtjes izraelite kanë folur publikisht për mundësinë e eliminimit të drejtuesve të lartë iranianë, ndërsa presidenti amerikan Donald Trump ka pranuar më herët se këto zhvillime e bëjnë më të ndërlikuar procesin negociues.
Në mars, Trump kishte refuzuar të jepte hollësi për palën iraniane me të cilën po zhvilloheshin bisedimet, duke thënë se “nuk dua që ata të vriten”.
“E di, është pak e vështirë”, është shprehur ai. “I kanë zhdukur të gjithë”, ka shtuar Trump.
Pas raportimit të “New York Times”, Zyra e Kryeministrit izraelit e hodhi poshtë lajmin, duke shkruar në rrjetin X: “Si zakonisht, artikulli i fundit i New York Times për Izraelin dhe negociatorët iranianë është lajm i rremë. Një trillim i plotë i realitetit.”
Një zëdhënës i ambasadës izraelite në Uashington ka refuzuar të komentojë, ndërsa CNN ka kërkuar reagim edhe nga Shtëpia e Bardhë.
