Jugun e Francës, Spanjën dhe Portugalinë e kanë goditur zjarre të fuqishme, që kanë shkrumbuar dhjetëra mijëra hektarë tokë, ndërsa temperaturat e larta, thatësira dhe era e fortë po e bëjnë shumë të vështirë punën e zjarrfikësve.
Të lidhura
None found
Gjendja është përkeqësuar ndjeshëm pas valëve të të nxehtit që kanë prekur Evropën Jugore gjatë javëve të fundit.
Në rajonin e Pirenejve Lindorë, në jug të Francës, një zjarr i rënë që nga mbrëmja e së shtunës ka përpirë afro 13.500 hektarë tokë. Vatra nisi në një zonë malore pranë malit Kanigu, ku ndërhyrja është e vështirë për shkak të terrenit. Në operacion janë përfshirë rreth 700 zjarrfikës, me mbështetje nga avionë dhe helikopterë.
Autoritetet në Francë bëjnë të ditur se situata po rëndohet nga erërat veriperëndimore dhe nga temperaturat, që në disa zona pritet të ngjiten deri në 40°C. Gjatë natës janë evakuuar banorë të zonës, ndërsa disa familje janë strehuar në ambiente të sigurta pasi u larguan nga banesat e tyre.
Në Spanjë, pranë zonës turistike të Costa Bravës, një zjarr ka djegur rreth 22.000 hektarë. Edhe pse flakët janë vënë nën kontroll, autoritetet theksojnë se dita mbetet problematike për shkak të temperaturave të larta dhe pranisë së shumë vatrave tymi. Në disa komunitete afër zonës Girona janë hequr kufizimet e lëvizjes dhe banorëve u është lejuar kthimi në shtëpi.
Vatra zjarri janë regjistruar edhe në Portugali, në kuadër të një sezoni të hershëm dhe të vështirë zjarresh që po përfshin rajonin.
Sipas autoriteteve franceze, pjesa më e madhe e zjarreve gjatë kësaj periudhe lidhet me aktivitetin njerëzor, ndërsa përhapja e tyre është favorizuar nga thatësira dhe temperaturat ekstreme. Ministri i Brendshëm i Francës ka shprehur shqetësim për faktin se këtë vit sezoni i zjarreve ka nisur më herët se zakonisht.
