Fluturimet drejt destinacioneve evropiane pritet të bëhen më të kushtueshme gjatë vitit 2027. Ryanair paralajmëron se çmimet e biletave mund të rriten me përqindje dyshifrore, deri në 20% në disa raste, për shkak të shtrenjtimit të karburantit pas përshkallëzimit të konfliktit në Lindjen e Mesme.
Shefi ekzekutiv i Ryanair, Michael O’Leary, tha se kostot më të larta të karburantit po rëndojnë mbi sektorin e aviacionit. Sipas tij, kompanitë ajrore në mbarë Evropën pritet t’i rrisin tarifat e fluturimeve.
Të lidhura
None found
O’Leary u shpreh se Ryanair mund të detyrohet t’i shtrenjtojë biletat deri në 20% për të mbuluar shpenzimet shtesë. Ai paralajmëroi se karburanti mund të mbetet i shtrenjtë deri në vitin 2027, nëse konflikti nuk zgjidhet shpejt.
Sipas përllogaritjeve të kompanisë, shpenzimet për karburant mund të shtohen me rreth 2 miliardë euro në afat të shkurtër. Ryanair ka siguruar 80% të nevojave të saj përmes kontratave me çmime fikse, por pjesa tjetër është ndikuar nga rritja e fortë e çmimeve në treg.
Për të përballuar këto kosto, kompania po shqyrton ngrirjen e përkohshme të pagave të punonjësve, e cila mund të fillojë nga prilli i vitit të ardhshëm. Në planet e saj janë edhe ngadalësimi i punësimeve dhe përdorimi më i gjerë i inteligjencës artificiale në sektorët administrativë.
Nisma e mundshme për pagat ka sjellë reagimin e sindikatës Unite. Përfaqësuesi i saj, Oliver Richardson, deklaroi se sindikata nuk është njoftuar për këtë propozim dhe kujtoi se marrëveshja shumëvjeçare e pagave përfshin edhe vitin e ardhshëm.
Ryanair njoftoi gjithashtu se fitimet para taksave ranë me 16%, duke arritur në 2.4 miliardë euro për gjashtë muajt deri në fund të shtatorit. Kompania renditi mes shkaqeve kryesore rritjen me 15% të kostove të karburantit.
