Arrestimet në kuadër të operacionit “Dosja 23” përbëjnë përparim në përpjekjet për të zbardhur krimet e luftës në Kosovë, sidomos në veriun e vendit, ku hetimet për shumë raste kanë qenë të pakta ose janë zhvilluar me vonesë. Kështu ka vlerësuar eksperti i sigurisë Hysen Gecaj.
Të lidhura
None found
Sipas Gecajt, suksesi i operacionit nuk duhet gjykuar thjesht nga numri i të arrestuarve. Më e rëndësishme është nëse hetimet do të sigurojnë prova të reja, do të zbulojnë zinxhirin e përgjegjësisë dhe do të ndihmojnë në sqarimin e fatit të civilëve viktima.
Ai nënvizon se ndjekja e krimeve të luftës mbetet përgjegjësi ligjore dhe morale, e cila nuk mund të lihet pas dore me kalimin e viteve.
“Nëse Prokuroria Speciale arrin të ndërtojë raste të bazuara në prova të forta dhe procedura të rregullta gjyqësore, ‘Dosja 23’ mund të shënojë një zhvillim të rëndësishëm në luftën kundër pandëshkueshmërisë”, shprehet ai.
Gecaj thotë se për viktimat dhe familjarët e tyre, zbulimi i së vërtetës dhe vendosja e drejtësisë janë thelbësore për pajtimin dhe për krijimin e një paqeje afatgjatë në Kosovë.
Në këtë kuadër, ai e sheh zbulimin e gjetjeve mortore të grupit të intelektualëve si një lehtësim të pjesshëm për dhimbjen e familjarëve e miqve të tyre, si dhe të popullit të Kosovës.
“Drejtësia, sado e vonuar, edhe pse e pakompensueshme për familjen dhe popullin e Kosovës, është e domosdoshme dhe e pashmangshme”, përfundon Gecaj.
