Procesi gjyqësor ndaj ish-krerëve të Ushtrisë Çlirimtare të Kosovës ka kaluar tashmë në betejën e shkallës së dytë në Gjykatën Speciale. Mbrojtja po harton argumentet me të cilat synon rrëzimin e aktgjykimit të shkallës së parë, ndërsa juristë ndërkombëtarë pretendojnë se Gjykata i ka tejkaluar kompetencat duke trajtuar si kriminale mjetet e luftës për shtetësi.
Të lidhura
None found
Në qendër të debatit mbetet mundësia që vendimi të ndryshojë në Apel, si dhe përvoja e ekipeve mbrojtëse në çështje të ngjashme të zhvilluara më parë në Tribunalin e Hagës.
Luka Mishetiq, avokat ndërkombëtar dhe pjesëtar i ekipeve të mbrojtjes në këtë proces, ka kundërshtuar ashpër mënyrën se si është interpretuar aktgjykimi ndaj ish-udhëheqësve të luftës së Kosovës.
Duke iu përgjigjur publikisht Marko Prelecit të Grupit Ndërkombëtar të Krizave, Mishetiq theksoi se Gjykata nuk kishte juridiksion për të shqyrtuar të drejtën e Kosovës për pavarësi, por megjithatë u përpoq t’i paraqiste si kriminale mjetet e përdorura për çlirimin e vendit.
Në reagimin e tij në platformën X, Mishetiq e cilësoi qasjen e Gjykatës si një kapërcim ligjor të paprecedentë. Sipas tij, Trupi Gjykues arriti në përfundimin se një pjesë e synimit të anëtarëve të Ndërmarrjes së Përbashkët Kriminale dhe personave të tjerë në udhëheqjen e UÇK-së ishte realizimi i pavarësisë së Kosovës përmes krimeve të luftës, ndonëse as Prokuroria nuk kishte shkuar kaq larg.
Vlerësimi i dhënë në shkallën e parë konsiderohet një goditje e pambështetur që prek vetë thelbin e kauzës çlirimtare të Kosovës. Megjithatë, për katër ish-krerët e Ushtrisë Çlirimtare të Kosovës që mbahen në Hagë, situata nuk shihet si e pakthyeshme. Juristët vendorë besojnë se përgatitja profesionale dhe përvoja ndërkombëtare e ekipeve të mbrojtjes mund të sjellin një ndryshim rrënjësor në Apel.
Shpresat lidhen edhe me precedentët e Tribunalit të Hagës për ish-Jugosllavinë, veçanërisht me çështjen e gjeneralit kroat Ante Gotovina. Avokati Florim Shefqeti kujtoi se Gotovina ishte dënuar në shkallën e parë, por më pas u shpall i pafajshëm në Apel. Ai shprehu dëshirën që të njëjtin fat ta kenë edhe krerët e Kosovës, sidomos për faktin se mbrojtja drejtohet nga i njëjti avokat, Luka Misetiq.
Për mbrojtjen dhe njohësit e së drejtës, rasti i Gotovinës është kthyer në pikën kryesore të referimit. Ata presin që etapa e ardhshme e procesit ta çlirojë aktgjykimin nga ngarkesat politike.
Vëmendja tani është përqendruar te Gjykata e Apelit. Argumentet e reja në mbrojtje të katër ish-krerëve të UÇK-së pritet të paraqiten pas dorëzimit zyrtar të njoftimit për apel, moment që do të shënojë edhe nisjen formale të procedurave për rrëzimin e vendimit të shkallës së parë.
